އިޒްރޭލުން ފަލަސްތީނުގެ ޣައްޒާއަށް ދެމުންދާ ހަމަލާތަކުގައި ސްކޫލަކަށް ހަމަލާދީ ގިނަ ބަޔަކު ޝަހީދު ކޮށްލައިފިއެވެ.
ބޭރުގެ މީޑިއާތަކުން ރިޕޯޓް ކޮށްފައިވާގޮތުގައި އިޒްރޭލުގެ ސިފައިން ވައިގެމަގުން ހަމަލާ ދީފައިވަނީ އ.ދ.އިން ހިންގަމުންދިޔަ ސްކޫލަކަށެވެ. އެ ސްކޫލަކީ، އިޒްރޭލުގެ ހަމަލާތަކުން ސަލާމަތްވުމަށް ރައްކާތެރިކަން ހޯދާފައިވާ ގިނަބަޔަކު ތިބި ސްކޫލެއް ކަމަށްވެސް ރިޕޯޓް ކޮށްފައިވެއެވެ.
އިޒްރޭލުގެ މި ހަމަލާތަކުގައި 32 މީހަކު ވަނީ ޝަހީދު ކޮށްލާފައެވެ. އަދި ގިނަ އަދަދެއްގެ ބަޔަކު ޒަހަމުކޮށްލާފައިވާ ކަމަށްވެސް ރިޕޯޓް ކޮށްފައިވެއެވެ.
އ.ދ.ގެ ކަމާބެހޭ އިދާރާތަކުން ނެރެފައިވާ ރިޕޯޓްތައް ދައްކާގޮތުގައި މިދިޔަ އޮކްޓޫބަރު މަހުން ފެށިގެން އިޒްރޭލުން ފަލަސްތީނުގައި ހުރި އެޖަމިއްޔާގެ އެކި ތަންތަނަށް ހަމަލާ ދިނުމުގެ ސަބަބުން ފަލަސްތީނުގެ 450 އަށްވުރެ ގިނަ މީހުން ޝަހީދުކޮށްލާފައިވެއެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ދެމުންދާ ހަމަލާތަކުގައި ޝަހީދުވި މީހުންގެ އަދަދު މިހާރު ވަނީ 36،000 އަށް ވުރެ މައްޗަށް އަރާފައެވެ. އިޒްރޭލުން މިދިޔަ މަހުގެ 6 ވަނަ ދުވަހުން ފެށިގެން ރަފާހްއަށް ބޮން އަޅަން ފަށާފައިވާއިރު އެގައުމުން މީގެކުރިން ވަނީ މިލިޓަރީ އޮޕަރޭޝަނެއް ފަށަން ބޭނުންވާތީ ރަފާހްގައި ދިރިއުޅެމުންދާ އެންމެން ވަޒަން ދޫކޮށް ދިޔުމަށް ވެސް އަންގާފައެވެ. ނަމަވެސް މިކަން މިގޮތަށް ނުކުރުމަށް އެތައް ގައުމަކުން އިޒްރޭލު ކިބައިން ވަނީ އެދިފައެވެ.
އިޒްރޭލުން ފަލަސްތީނުގައި ހިންގަމުންދާ ޖަރީމާތަކާ ގުޅިގެން އިންޓަނޭޝަނަލް ކްރިމިނަލް ކޯޓުގެ ޗީފް ޕްރޮސެކިއުޓާ ކަރީމް ހާން ވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި ދިފާއީ ވަޒީރު ޔޯއާވް ގަލަންޓް ހައްޔަރުކުރުމުގެ އަމުރަކަށް އިންޓަނޭޝަނަލް ކްރިމިނަލް ކޯޓުގައި އެދިފައެވެ.