މަސައްކަތުގެ ހުނަރު ޒުވާނުންނަށް ދަސްކޮށް ދޭން ރޯޑު ޑިވެލޮޕްމެންޓު ކޯޕަރޭޝަން (އާރްޑީސީ) އިން ހިންގަން ފެށި "ބިނާވެހި" ޕްރޮގްރާމުގެ ފުރަތަމަ ބުރު ނިންމާލައިފި އެވެ.
އިއްޔެ ނިންމާލައި ބައިވެރިންނަށް ސެޓްފިކެޓް ދިން ޕްރޮގްރާމްގައި ޖުމްލަ 11 ބައިވެރިން ހިމެނުނު ނަމަވެސް ޕްރޮގްރާމް ފުރިހަމަކޮށް ސެޓްފިކެޓް ހާސިލުކުރީ ފަސް ބައިވެރިއެކެވެ.
ނުވަ މަސް ދުވަހަށް ހިންގި ޕްރޮގްރާމްގައި ކޮންމެ ބައިވެރިއަކަށް މަހަކު 5000ރ. ގެ އެލަވެންސެއް ދީފައިވެއެވެ.
އާރްޑީސީގެ "ބިނާވެހި" ޕްރޮގްރާމް ހާއްސަކޮށްފައި ވަނީ 16-21 އަހަރާ ދެމެދުގެ ޒުވާނުންނަށެވެ. މީގެ މައިގަނޑު މަގުސަދަކީ މަސައްކަތުގެ މާހައުލަށް ދަރިވަރުން ހާނުވައި، މަސައްކަތުގެ މާހައުލަށް ނިކުންނަންވާ އިރަށް ދާއިރާގައި ތަޖުރިބާ ހުރި ފަރާތްތަކާ އެކީ މަސައްކަތް ކުރުމުގެ ފުރުސަތު ހޯދައި ދިނުމެވެ.
"ބިނާވެހި" އަކީ ސާނަވީ އިމްތިހާނަށް ފަހު މަތީ ސާވަނީ ތަޢުލީމު ފެށުމާދޭތެ ރޭ ނުވަތަ މަތީ ޠާނަވީ އިމްތިހާނަށް ފަހު ކޮލެޖްތަކުގައި ކިޔަވަމުން އަންނަ ދަރިވަރިވަރުންނަށް ނުވަތަ ތަޢުލީމު ދޭ މަރުކަޒުތަކަށް ހާޒިރުނުވާ ޒުވާނުންނަށް އެކި ދާއިރާތަކުން މަސައްކަތުގެ ހުނަރާއި ތަމްރީނު އަދި ތަޖުރިބާ ހުރި ފަރާތްތަކާއެކު މަސައްކަތް ކުރުމުގެ ފުރުސަތު ހޯދައިދިނުމުގެ ގޮތުން ފެށި ޕްރޮގްރާމެކެވެ.
އެގޮތުން ފުރަތަމަ ބުރުގެ ބައިވެރިންނަށް ތަފާތު 12 ދާއިރާއަކުން ތަރުޖިބާ ހޯދުމުގެ މަގުފަހިކޮށް ދީފައިވެ އެވެ. އޭގެ ތެރޭގައި އެކޮމަޑޭޝަން ފެސިލިޓީ މެނޭޖްމަންޓް، އެޑްމިނިސްޓްރޭޝަން، ސެކިއުރިޓީ އެންޑް ސޭފްޓީ، އިންވެންޓްރީ، އައިސީޓީ، ލޮޖިސްޓިކްސް، ޕްރޮޑަކްޝަން، އެޗްއާރް، ޕްރޮޖެކްޓް މެނޭޖްމަންޓް، ޕްރޮޖެކްޓް އިމްޕްލިމެންޓޭޝަން، ސޭލްސް އެންޑް މާކެޓިން، ޕަބްލިކް ރިލޭޝަންސް ހިމެނެ އެވެ.
ޕްރޮގްރާމް ތެރޭގައި އަހުލުވެރިވުމަށް ފީލްޑް ޓްރިޕް ދިއުމާއި، އާރުޑީސީއަށް ފުރުސަތު ލިބޭ އެކިއެކި ތަމްރީން ޕްރޮގްރާމްތަކުގައި ބައިވެރިވުމުގެ ފުރުސަތު ބައިވެރިންނަށް ދީފައިވެ އެވެ.