ބޮލީވުޑްގެ މަޝްހޫރު ތަރި އަނިލް ކަޕޫރް ހޯސްޓްކުރާ ގޮތަށް މި ފަހަރު ގެނެސްދޭ ކަލާސްގެ ރިއަލިޓީ ޝޯ "ބިގް ބިސް އޯޓީޓީ" ގެ ތިން ވަނަ ސީޒަން މި މަހުގެ 21 ގައި ޕްރީމިއާކުރަން ނިންމިކަން އިއުލާންކޮށްފި އެވެ.
މި ޝޯ ގެނެސްދޭނީ މިދިޔަ އަހަރު ލޯންޗްކުރި ސްޓްރީމިން ޕްލެޓްފޯމް، ޖިއޯ ސިނެމާއިންނެވެ.
"ބިގް ބޮސް އޯޓީޓީ 3" ހޯސްޓްކުރުމުގެ ފުރުސަތު މި ފަހަރު އަނިލް އަށް ލިބުނީ ކުރީގެ ދެ ސީޒަން ހޯސްޓްކުރި ސަލްމާން ޚާން މި މަހުގެ ތެރޭގައި އާ ފިލްމު "ސިކަންދަރު" ޝޫޓިން އަށް ވަގުތު ހުސްކުރަން ޖެހުމާ ގުޅިގެން، ޝޯ އަށް ވަގުތު ދޭން ދަތިވުމާ ގުޅިގެންނެވެ. އެކަމަކު އޭނައާ އެކީ އަހަރުގެ ފަހުކޮޅު "ބިގް ބޮސް" 18 ވަނަ ސީޒަން ކަލާސް ޓީވީން ގެނެސްދޭނެ އެވެ.
ސަލްމާނަކީ "ބިގް ބޮސް" ގެ ރަސްމީ ހޯސްޓެވެ. އޭނަ މި ޝޯ ހޯސްޓްކުރާތާ ގިނަ އަހަރުތަކެއްވެފައިވެ އެވެ.
އަނިލް ބުނީ "ބިގް ބޮސް އޯޓީޓީ 3" ހޯސްޓްކުރަން ލިބުމަކީ ޖިއޯ ސިނެމާއާ އެކީ ކުރެވޭ ވަރަށް ހިތްގައިމު ތަޖުރިބާއަކަަށްވާނެކަމުގެ އުންމީދު ބޮޑު ކަމަށާއި ޝޯ އިން ލިބުނު ފުރުސަތު ލިބުމަކީ އުފަލެއް ކަމަށެވެ.