އައްޑޫ ހިތަދޫން ގޯތި ލިބުނު މީހުންނާ ގޯތިތައް ހަވާލު ކުރުމުގެ މަސައްކަތުގެ ތެރެއިން މިއަދާ ހަމައަށް 50 ގޯތި ހަވާލުކޮށްފައިވާ ކަމަށް ހިތަދޫ އަވަށު އޮފީހުން ބުނެފި އެވެ.
ގޯތިތައް ލިބުނު މީހުންނާ ގޯތިތައް ހަވާލުކުރުމުގެ މަސައްކަތް އަވަށު އޮފީހުން ފެށީ މި މަހުގެ 3 ވަނަ ދުވަހު އެވެ. އެ އަވަށުން ދޫނުކުރަން ނިންމީ 500 ގޯއްޗެވެ. އަވަށު އޮފީހުން ބުނީ އަމާޒަކީ ވީހާ ވެސް އަވަހަކަށް ހުރިހާ ގޯއްޗެއް ހަވާލުކޮށް ނިންމުން ކަމަށެވެ. އެހެންވެ ވަރަށް ބާރަށް ކުރިއަށްދާ ކަމަށް ބުންޏެވެ.
ހިތަދުއާ އެކީ އައްޑޫގެ އިތުރުން ތިން އަވަށަކުން ޖުމްލަ 1،000 ގޯއްޗަށް އައްޑޫ ސިޓީ ކައުންސިލުން ހުޅުވީ މިދިޔަ އަހަރުގެ ޖެނުއަރީ މަހުގެ ތެރޭގަ އެވެ. އެގޮތުން ފޭދޫން 300، މީދޫން 100 އަދި ހުޅުދޫން 100 ގޯތި ދޫކުރަން ނިންމި އެވެ. ފޭދު އާއި ހިތަދޫން 1،500 އަކަފޫޓްގެ ގޯތި ދޫކުރަން ނިންމި އިރު، ހުޅުމީދޫން ދޫކުރަން ނިންމީ 2،000 އަކަފޫޓްގެ ގޯއްޗެވެ.
ފޭދޫން ގޯތި ލިބުނު މީހުންނާ ވެސް ގޯތިތައް ހަވާލުކުރުމުގެ މަސައްކަތް އެ އަވަށު އޮފީހުން އަންނަނީ ކުރަމުންނެވެ. އަދި ހުޅުދު އާއި މީދޫގައި ވެސް މިހާރު އަންނަނީ ގޯތިތައް ހަވާލުކުރުމުގެ ތައްޔާރީތައްވަމުންނެވެ.