ރައްޔިތުންގެ މަޖިލީހުގެ ޗީފް އޮފް ބިއުރޯގެ މަގާމުގައި މިހާރު ހުންނެވި ވިލިމާލެ ދާއިރާގެ ކުރީގެ މެންބަރު އަހުމަދު ނިހާން ހުސައިން މަނިކުގެ މައްޗަށް ކޮށްފައިވާ ރިޝްވަތާއި މަނީ ލޯންޑަރިންގެ ދައުވާތައް އަނބުރާ ގެންދަން ނިންމާފައިވާކަން ޕްރޮސިކިއުޓާ ޖެނެރަލް (ޕީޖީ) އޮފީހުން ނިންމައިފި އެވެ.
އެގޮތަށް ނިންމައި އޭނަ އަށް އެކަން ޕީޖީ އޮފީހުން ވަނީ އަންގައި ވެސް ފަ އެވެ.
ޕީޕީއެމްގެ ޕާލިމެންޓްރީ ގްރޫޕްގެ ކުރީގެ ލީޑަރު ނިހާންގެ މައްޗަށް ރިޝްވަތުގެ ހަތަރު ދައުވާއަކާއި މަނީލޯންޑްރިންގެ ދައުވާއެއް ދައުލަތުން ވަނީ އުފުލި އެވެ. އެ ދައުވާތައް އަނބުރާ ނަގަން ނިންމިކަން އަންގައި ޕީޖީ އޮފީހުން ފޮނުވި ސިޓީއެއްގައި ބުނެފައި ވަނީ އެ މައްސަލަތއް އެ އޮފީހުން މުރާޖައާ ކުރުމަށް ފަހު މައްސަލަ އިތުރަށް ކުރިއަށް ނުގެންދަން ނިންމާފައިވާ ކަމަށެވެ.
އެކަމަކު ސިޓީގައި ސަބަބެއް ހާމަކޮށްފައެއް ނުވެ އެވެ.
ނިހާނަކީ މިހާރު ޖުމްހޫރީ ޕާޓީ އަށް ނިސްބަތްވާ ބޭފުޅެކެވެ.