އެވިޑް އިންޓަނޭޝަނަލް ސްކޫލުގެ ނަމުގައި ހއ. ހޯރަފުށީގައި އިންޓަނޭޝަނަލް ސުކޫލެއް ހުޅުވަން ތައްޔާރުވާން ފަށައިފި އެވެ.
މި ސްކޫލަކީ ހއ. އަތޮޅުގައި ކެމްބްރިޖާ ގުޅިގެން އާލީ ލާނާސް ކަރިކިއުލަމަށް އެންމެ ފުރަތަމަ ކިޔަވައިދޭ ގޮތަށް ހުޅުވާ އިންޓަނޭޝަަނަލް ސްކޫލެވެ. އާ ސުކޫލްގައި އެންމެ ފުރަތަމަ ކިޔަވައި ދޭން ހަމަޖެހިފައި ވަނީ ބޭބީ ނާސަރީ، ނާސަރީ، އެލްކޭޖީ އަދި ޔޫކޭޖީގެ ކުލާސްތަކެވެ.
އެވިޑް އިންޓަނޭޝަލް ސްކޫލުގެ އިމާރާތާއި އައުޓްޑޯ ޕްލޭ އޭރިއާގެ ތަކެއްޗާއި ފަރުނީޗަރު ވެސް ހޯދައި ދިނީ ހއ. އަތޮޅު ކައުންސިލުންނެވެ. މި ސްކޫލު ހިންގުމުށް ވެސް އަތޮޅު ކައުންސިލުން އެހީތެރިކަން ލިބޭނެ ކަމަށް ހޯރަފުށީ ކައުންސިލުން ބުންޏެވެ.
ރާއްޖޭގެ އެންމެ މަގުބޫލު ޕްރައިވެޓް ކޮލެޖްތަކުގެ ތެރޭގައި ހިމެނޭ އެވިޑުން ކެމްބްރިޖާ ގުޅިގެން ހޯރަފުށީގައި ހުޅުވި އިންޓަނޭޝަނަލް ސްކޫލާ ބެހޭ ގޮތުން އެވިޑް ކޮލެޖްގެ ޗެއާމަން އަދި އެވިޑް އިންޓަނޭޝަނަލް ސްކޫލުގެ މަސްޢޫލުވެރިޔާ އަބްދުﷲ މުޝްތާޤް ރަޝާދު ވިދާޅުވީ، އިންޓަނޭޝަނަލް ސުކޫލެއް ނެތް ބޮޑެތި އާބާދީތައް ހުރި ސަރަހައްދުތަކުގައި ވީ އެންމެ އަވަހަކަށް މި ޚިދުމަތް ފުޅާ ކުރަން މަސައްކަތްތަކެއް ކުރައްވަމުން ގެންދަވާ ކަމަށެވެ.