ލ.އަތޮޅަށް ޓޫރިސްޓުުން ޒިޔާރަތް މިންވަރު ވަޒަން ކުރުމަށް ސާވޭއެއް ހެދުމަށް ނިންމައި ސާވޭ ހަދާނެ ފަރާތެއް ހޯދަން އެންވަޔަރަމަންޓް މިނިސްޓްރީން ބީލަމަށް ހުޅުވާލައިފި އެވެ.
އެ މިނިސްޓްރީ ބުނީ އެންހާންސިން ނޭޝަނަލް ޑިވެލޮޕްމަންޓް ތުރޫ އެންވަޔަރަންމަންޓަލީ ރެޒިލިއަންޓް އައިލެންޑް (އެންދެރި) މަޝްރޫއުގެ ދަށުން، ލ. އަތޮޅަށް ޓޫރިސްޓުން ޒިޔާރަތްކުރާ ވަރާއި ގުދުރަތީ ތަންތަން ބޭނުން ކުރާ މިންވަރު ވަޒަން ކުރުމަށް ސާވޭ ހެދުމަށް ބޭނުންވާ ކަމަށެވެ.
އެހެންވެ އެ މަސައްކަތްކޮށް ދޭން ޝައުވެރިވާ ފަރާތްތަކަށް ބީލަން ހުށަޅުމުގެ ފުރުސަތު އަންނަ މަހުގެ 1 އާ ހަމައަށް ވަނީ ހުޅުވާލައިފި އެވެ.
މިކަމާ ގުޅޭ ގޮތުން އެއްވެސް ސުވާލެއްވާ ނަމަ، އީ-މެއިލް ކުރާނީ މި މަހުގެ 12 ވަނަ ދުވަހުގެ މެންދުރު 12:00 ގެ ކުރިން މި މެއިލަށެވެ.
ރާއްޖޭގެ އެންމެ ބޮޑު އަތޮޅު ކަމަށްވާ ލ. އަތޮޅަށް ޓޫރިސްޓުން ޒިޔާރަތްކުރާ މިންވަރު ބަލަން ސާވޭއއް ހަދަން ނިންމި އިރު، އެ އަތޮޅުގައި އަދި އެއްވެސް ރިސޯޓެއް ނެތެވެ. އެކަމަކު ލ. އަތޮޅުގެ ރަށްތަކުގައި ބޮޑެތި ގެސްޓްހައުސްތައް ހިންގަ އެވެ.
ލ. އަތޮޅަކީ މިހާރުގެ ޓޫރިޒަމް މިނިސްޓަރު އިބްރާހީމް ފައިސަލް ނިސްބަތްވާ އަތޮޅެވެ. މިނިސްޓަރު ދާދި ފަހުން ވިދާޅުވީ ލ. އަތޮޅޫގައި ރިސޯޓްތަކެއް ތަރައްގީ ކުރަން އިންވެސްޓަރުން ހޯދަން ސަރުކާރުން މަސައްކަތް ކުރާނެ އެވެ.