ރައްޔިތުންގެ މަޖިލީހުގެ ޗީފް އޮފް ބިއުރޯގެ މަގާމަށް އައްޔަންކުރި ވިލިމާލެ ދާއިރާގެ ކުރީގެ މަޖިލިސް މެންބަރު އަހުމަދު ނިހާން ހުސައިން މަނިކުގެ މައްޗަށް ކޮށްފައިވާ ރިޝްވަތާއި މަނީ ލޯންޑަރިންގެ ދައުވާތައް އަނބުރާ ގެންދަން ޕްރޮސިކިއުޓާ ޖެނެރަލް (ޕީޖީ) އޮފީހުން ނިންމުމާ ގުޅިގެން ޕީޕަލްސް ނެޝަނަލް ފްރޮންޓް (ޕީއެންއެފް) އިން ފާޑު ކިޔައިފި އެވެ.
އެ ޕާޓީގެ ސެނެޓް މެންބަރެއް ކަމަށްވާ ކުރީގެ މިނިސްޓަރު މުހައްމަދު މަލީހު ޖަމާލު އެކްސްގައި ވިދާޅުވީ ވައިޖެހޭ ކޮޅަކަށް ދީލާލާ މުއައްސަސާތަކުގެ ވެރީންނަކީ ޤާނޫނުއަސާސީގެ ދުޝްމަނުން ކަމަށެވެ.
"ވަޒީފާގެ އަޅުން. ސިޔާސީ ބޭފުޅުންގެ ތުންފުހި. މުޅި ގައުމަށް ލަދުވެތި ދުވަހެއް." އޭނަ ވިދާޅުވި އެވެ.
ނިހާނަށް ކުރި ދައުވާތަ އަނބުރާ ނަގަން ނިންމިކަން އަންގައި ޕީޖީން ފޮނުވި ސިޓީއެއްގައި ބުނެފައި ވަނީ އެ މައްސަލަތައް އެ އޮފީހުން މުރާޖައާ ކުރުމަށް ފަހު މައްސަލަ އިތުރަށް ކުރިއަށް ނުގެންދަން ނިންމާފައިވާ ކަމަށެވެ. އެކަމަކު ސިޓީގައި ސަބަބެއް ހާމަކޮށްފައެއް ނުވެ އެވެ.
ނިހާންގެ މައްޗަށް ރިޝްވަތުގެ ހަތަރު ދައުވާއަކާއި މަނީލޯންޑްރިންގެ ދައުވާއެއް ދައުލަތުން އުފުލި އެވެ.