ކުޅިވަރު ޖަމިއްޔާތަކުން ފައިސާ ހަރަދުކުރާ ގޮތާމެދު ޖަވާބުދާރީވުމުގެ ޒިންމާއެއް އޮންނާނެކަން ޤަބޫލުކުރަންޖެހޭ ކަމަށް ޕްރޮސިކިއުޓާ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމް މިގޮތަށް ވިދާޅުވީ އަމިއްލަ ބްލޮގްގައި "ކުޅިވަރު ޖަމްޢިއްޔާތައް ޒިންމާދާރު ކުރުވުން -1" ނަމުގައި އާންމު ކޮށްފައިވާ ލިޔުމެއްގައެވެ. އެގޮތުން އެލިޔުމުގައި ޝަމީމް ވިދާޅުވެފައިވަނީ، ކުޅިވަރަކީ ކުޅިވަރެއް ނޫން ކަމަށާއި ކުޅިވަރު ކުޅިވަރަކަށް ހަދަނީ، ކުޅިވަރަކީ ކުޅިވަރެއް ނޫންކަން ނުދަންނަ މީހުން ކަމަށެވެ. ބައެއް ކުޅިވަރު ޖަމިއްޔާތަކުން ދެކެނީ، ސަރުކާރަކަށް އެ ޖަމިއްޔާތަކުގެ މައްޗަށް ބަހެއް ނުބުނެވޭނެ ކަމަށްކަން ފާހަގަކޮށް ޝަމީމް ވިދާޅުވެފައިވަނީ ހަޤީޤަތަކީ އެއީ ނޫން ކަމަށެވެ.
2024 ވަނަ އަހަރުގެ ބަޖެޓްގައި ސްޕޯޓްސް މިނިސްޓްރީގެ ބަޖެޓުގެ ތެރެއިން ކުޅިވަރު ކުޅޭ ތަންތަނަށް ކުރާ ޚަރަދުގެ ގޮތުގައި 122.1 މިލިއަން ރުފިޔާ ހިމަނާފައިވާކަން ފާހަގަކޮށް ޝަމީމް ވިދާޅުވީ ޤައުމީ ކުޅިވަރު ޖަމިއްޔާތަކަށް ސަރުކާރުން އޮފީހަކާއި ވަކި އަދަދަކަށް މުވައްޒަފުން ހަމަޖައްސައިދޭ ކަމަށާއި ޖަމިއްޔާ ހިންގުމަށް ދައުލަތުގެ ބަޖެޓުން ފައިސާ ހަރަދު ކުރާ ކަމަށެވެ.
ޝަމީމް ވިދާޅުވެފައިވަނީ އެކި ކުޅިވަރުތަށްކުޅޭ ދަނޑުތަކާއި ކޯޓުތަކަށް ހަރަދުކުރަނީ ސަރުކާރުން ދޭ ފައިސާއިން ކަމަށާއި އެ ފައިސާ، އެސޯސިއޭޝަންގެ ބަޖެޓުން ފެނި، އޭގެން ނެރެވުނު ނަތީޖާވެސް އެނގެންވާނެ ކަމަށެވެ.
މީގެއިތުރުން ޝަމީމް ވިދާޅުވީ ރައްޔިތުންގެ ފައިސާ ކުޅިވަރު ޖަމިއްޔާތަކުން ހަރަދުކުރާނަމަ، އެއީ ދައުލަތުގެ ފައިސާކަމަށްވާތީ، ފައިސާއާމެދު އަމަލުކުރަންޖެހޭ ޤާނޫނީ ހަމަތަކެއް ހުންނަކަމަށެވެ. އެގޮތުން މާލިއްޔަތު ޤާނޫނާއި އެ ޤާނޫނުގެ ދަށުން ހަދާފައިވާ ޤަވާއިދުތަކާއި، އެ އުސޫލުތަކަށް އަމަލުނުކުރާނަމަ، ފާރަވެރިވާ އިދާރާތައް ކަމަށްވާ އެންޓިކޮރަޕްޝަން ކޮމިޝަނާއި، ފައިނޭންޝަން އިންޓެލިޖެންސް ޔުނިޓާއި، ދިވެހި ފުލުހުންގެ ހިދުމަތުން އެމައްސަލައެއް ބަލާނެކަން ޝަމީމް ފާހަގަ ކުރެއްވިއެވެ.
"އެކަން ކުރަނީ ސަރުކާރުގެ މުވައްޒަފެއްތޯ، "މިނިވަން" ޖަމްޢިއްޔާއެއްގެ ރައީސްތޯއެއް އެ ތަނަކުން ނުބަލާނެއެވެ. ބަލަނީ ކާކުގެ ފައިސާއެއްތޯއެވެ. ރައްޔިތުންގެ ފައިސާނަމަ، އެ ފައިސާ ޚަރަދުކުރާނެ ހަމަތަކެއް ހުންނާނެއެވެ. އެ ހަމަތަކާ އެއްގޮތަށް ޢަމަލުކުރާކަން ކަށަވަރުކުރުމަކީ ދައުލަތުގެ ޒިންމާއެކެވެ." ޝަމީމް ލިޔުއްވާފައިވެއެވެ.
ޝަމީމް ވިދާޅުވީ ކުޅިވަރު ޖަމިއްޔާއަށްދޭ ފައިސާ ބޭނުން ގޮތަކަށް ހަރަދުކުރުމަށްފަހު، ތިމަންނާއަކީ 'މިނިވަން' މީހެއްކަމަށާއި، ތިމަންނާއަކީ "އެއްވެސް މުސާރައެއް ނުވަތަ އުޖޫރައެއް ލިބޭ މީހެއް ނޫންކަމަށް" ބުނެ ދިފާއެއް ނުނެގޭކަމާއި، އެހެން ބުނެގެން ފަރެއް ނުޖެއްސޭނެކަން މިފަހުން މަތީމަރުހަލާގެ ކޯޓުތަކުން ނިންމާފައިވާ ބައެއް ނިންމުންތަކުން އެނގޭ ކަމަށެވެ. މިކަން ފާހަގަކޮށް ޝަމީމް ވަނީ ބެޑްމިންޓަން އެސޯސިއޭޝަންގެ ރައީސް މޫސާ ނާޝިދު، މަޤާމުގެ ނުފޫޒު ނަހަމަގޮތުގައި ބޭނުންކޮށްގެން ކޮރަޕްޝަނުގެ އަމަލުތަކެއް ހިންގަމުންދާކަމަށްބުނެ އޭސީސީއަށް ހުށަހަޅާފައިވާ މައްސަލައަކާ ގުޅިގެން ކްރިމިނަލް ކޯޓުން ނެރުނު ދެ އަމުރެއް ހައިކޯޓުން ދެމެހެއްޓި މައްސަލައިގެ ޤަޟިއްޔާ ރިޕޯޓް ހިމަނާފައެވެ.
"ކުޅިވަރު ޖަމްޢިއްޔާތަކުން ފަޚުރުވެރިވާ "ޤާނޫނީ ޙައިސިއްޔަތު" އާ އެއްކޮށް، ފައިސާ ޚަރަދުކުރާ ގޮތާމެދު ޖަވާބުދާރީވުމުގެ ޒިންމާއެއް އޮންނާނެކަން ޤަބޫލުކުރަންޖެހެއެވެ." ޝަމީމް އޭނާގެ ބްލޮގްގައި ލިޔުއްވާފައިވެއެވެ.
ކުޅިވަރު ޖަމިއްޔާތަކުން ފައިސާ ހަރަދުކުރާ ގޮތާ ގުޅޭގޮތުން ޕީޖީ ޝަމީމް އަމިއްލަ ބްލޮގުގައި ލިޔުމެއް ލިޔުއްވާފައިވާއިރު މިފަހުން ރާއްޖޭގެ ބައެއް ކުޅިވަރު ޖަމިއްޔާތަކުން ފައިސާ ހަރަދުކުރާގޮތާގުޅޭ މައްސަލަތަކެއް ފެންމަތިވެފައެވެ. އޭގެތެރެއިން އެންމެބޮޑަށް ފާހަގަކުރެވެނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ މައްސަލައެވެ. ކޮރަޕްޝަނާއި މަނީލޯންޑަރިންގެ ތުހުމަތުގެ ތަހުގީގުގައި ފުލުހުން އަންނަނީ އެ އިދާރާގެ އެކި ތަންތަން ބަލާފާސްކުރަމުންނެވެ. އަދި މި މައްސަލަތަކުގެ ތެރެއިން އެފްއޭއެމްގެ ކުރީގެ ރައީސް ބައްސާމް އަދީލް ޖަލީލަށް ވެސް ވަނީ ދައުވާ ކޮށްފައެވެ.