ރ އުނގޫފާރުގައި، ކަރަންޓުގައި ޖެހިގެން އައިޖީއެމްއެޗްގެ އައިސީޔޫގައި ފަރުވާ ދެމުން ދިޔަ ޒުވާނާ މިއަދު ހެނދުނު ނިޔާވެއްޖެ އެވެ.
ހުސައިން އަތީކް، 18 ނިޔާވީ އައިޖީއެމްއެޗްގެ ހައި ޑިޕެންޑެންސީ ޔުނިޓު (އެޗްޑީޔޫ) ގައި ފަރުބާ ދެމުން ދަނިކޮށެވެ. އޭނަ ފަރުވާ މާލެ ގެންދިޔައީ މިދިޔަ މަހުގެ 25 ގަ އެވެ.
އަތީކް ނިޔާވީ ކަރަންޓްގައި ޖެހި ލިބުނު ސީރިއަސް ގެއްލުންތަކަށް މާ ބޮޑު ކުރިއެރުމެއް ވެސް ނުލިބި އެވެ. އޭނަގެ ކިޑްނީގައި ފެން އުފެދިފައިވާތީ ޑަޔަލަސިސް ވެސް ހަދާފައިވާ އިރު، ފުއްޕާމެ އާއި އެތެރެހަށީގެ ގިނަ ގުނަވަންތަކަކަށް ވަރަށް ބޮޑަށް ގެއްލުންވެފައިވާ ކަމަށް ޑޮކްޓަރުންނާ ހަވާލާދީ އާއިލާ އިން ބުނެފައިވެ އެވެ.
މިދިޔަ މަހުގެ 23 ވަނަ ދުވަހު ހިނގި ހާދިސާގައި އަތީކް ވަނީ ކަރަންޓްގައި ޖެހުނު 12 އަހަރުގެ އަންހެން ކުއްޖަކާއި 8 އަހަރުގެ ފިރިހެން ކުއްޖަކު ސަލާމަތްކޮށްފަ އެވެ. އެ ހާދިސާ ހިނގީ އުނގޫފާރު ކުޑަކުދިންގެ ޕާކް ކައިރީ މަގުމަތީގައި އޮތް ފެންގަނޑަކަށް މަގުގެ ހޮޅިދަނޑިއަލުން ކަރަންޓް އައިސްގެންނެވެ.