ސްކޭމްތަކާ ދެކޮޅަށް މަސައްކަތް ކުރަން އެންޓ-ިސްކޭމް ސެންޓަރެއް ގާއިމު ކުރަން ފުލުހުން ނިންމައިފި އެވެ.
ފުލުހުންގެ ކުރިއަށް އޮތް ފަސް އަހަރުގެ ސްޓްރެޓީޖިކް އެކްޝަން ޕްލޭނާ ގުޅޭ ގޮތުން އެސިސްޓެންޓް ޕޮލިސް ކޮމިޝަނަރު އަހުމަދު ޝިފާން ދައުލަތުގެ މީޑިއާގައި ރޭ ވިދާޅުވީ ދިވެހިން މިހާރު އެންމެ ކަންބޮޑުވަނީ ސްކޭމްގެ ކުށްތަކާ ގުޅިގެން ކަމަށެވެ. ރާއްޖޭގައި މިފަދަ މައްސަލަތައް ވަރަށް ގިނަ އެވެ.
"[އެހެންވެ] އަޅުގަނޑުމެން އެބަ އެސްޓަބްލިޝްކުރަން ވަރަށް އަވަހަށް މި ސްޓްރެޓީޖިކް ޕްލޭންގެ ތެރެއިން އެންޓި ސްކޭމް ސެންޓަރެއް،" ޝިފާން ވިދާޅުވި އެވެ. "އެންޓި ސްކޭމް ސެންޓަރަކީ އަޅުގަނޑުމެން ހަމައެކަނި އިންވެންޓުކުރާ އެއްޗެއް ނޫން. ދުނިޔޭގެ ބޮޑެތި ގައުމުތަކުގައި މިހާރު މަސައްކަތް ކުރާ ކޮންސެޕްޓެއް މިއީ."
ޝިފާން ވިދާޅުވީ އެ ސެންޓަރު ގާއިމުކުރެވުމުން ރާއްޖޭގެ ކޮންމެ ސަރަހައްދަކުން ހުށަހެޅޭ ސްކޭމްގެ މައްސަލައެއްގައި ވެސް ފުރަތަމަ ރެސްޕޮންސް ދޭނީ އެ ސެންޓަރުން ކަމަށެވެ.
"ވިކްޓިމައިޒްވެފަ ހުންނަ މީހަކު އިތުރަށް ވިކްޓިމައިޒް ނުވަން ކުރަން ޖެހޭ ހުރިހާ މަސައްކަތެއް ވަގުތުން ކުރާނެ،" " އޭނަ ވިދާޅުވި އެވެ. "ބޭންކުތަކާ ގުޅިގެން އެ މީހާ އަށް ހިމާޔަތްދީ އެ މީހާ އަށް ކޮށްދެން ޖެހޭ ކަންކަން ކުރުމަށްޓާކާ އެންޓި ސްކޭމް ސެންޓަރު ހާއްސަވާނީ."
ނަމަވެސް އެންޓި-ސްކޭމް ސެންޓަރު ވުޖޫދަށް ގެންނާނެ ވަކި ޓައިމްފްރޭމެއް ޝިފާން ނުދެއްދވަ އެވެ.
އޭނަ ވިދާޅިވީ ރާއްޖޭގައި ސްކޭމްގެ މައްސަލަތައް ދުވަހުން ދުވަހަށް އިތުރުވެ، މިކަންބޮޑުވުން ރައްޔިތުންގެ ތެރޭގައި ބޮޑުވަމުންދާ އިރު، ސްކޭމްތަކުގެ މައްސަލަތަކުގެ ރެކޯޑް ފުލުހުން ބަލަހައްޓަން ފެށި ފަހުން މިހައިތަނަށް އާންމުންގެ އަތުން ގެއްލުނު ފައިސާގެ އަދަދު 150 މިލިއަނަށް ވުރެ އިތުރު ކަމަށެވެ.
އެގޮތުން 2021 އިން ފެށިގެން ސްކޭމް މައްސަލަތަކުގެ ރިކޯޑު ބަލަހައްޓަން ފެށި ފަހުން މިހާތަނަށް އެފަދަ 28،003 މައްސަލައެއް، ހުށަހަޅާފައިވެ އެވެ. އަދި އެ މައްސަލަތަކުގެ ޖުމުލަ ގެއްލުން 57.8 މިލިއަނަށް އަރަ އެވެ.