ބޮލީވުޑްގެ މިދިޔަ އަހަރުގެ ފިލްމު "އެނިމަލް" ގައި ކުޅުނު ރޯލާ އެކީ ބޮޑު މަޝްހޫރު ކަމެއް ލިބި، ޑިމާންޑް ވަރަށް ބޮޑަށް އުފުލިފައިވާ ޒުވާން ބަތަލާ ޓްރިޕްތީ ދިމްރީ މުމްބާއީ އިން އާ ގެއެއް ގަނެފި އެވެ.
މީޑިއާތަކުން ބުނީ ބޮލީވުޑްގެ ގިނަ ބަޔަކު ދިރިއުޅޭ މުމްބާއީގެ ބަންޑްރާ ސަރަހައްދުން 30 އަހަރުގެ ބަތަލާ ގަތް ގޭގެ އަގު 14 ކްރޯޑް ރުޕީސް (1.7 މިލިއަން ޑޮލަރު) އަށް އަރާ ކަމަށެވެ. ޓްރިޕްތީ ގަތް އަގުބޮޑު ގެ އަކީ އެ ގެ އާއި ގެ ހިމެނޭ ގޯއްޗާ އެކީ ޖުމްލަ 2،226 އަކަފޫޓްގެ ބިމެކެވެ.
މިހާރު ގިނަ ފިލްމުތަކުން ފުރުސަތުތައް އޮހެމުން އަންނަ ބަތަލާ ދެން އެންމެ އަވަހަށް ފެންނާނީ ފިލްމަކީ އަންނަ މަހުގެ 19 ގައި ކަރަން ޖޯހަރްގެ ދަރުމާ ޕްރޮޑަކްޝަނުން ގެނެސްދޭ ރޮމޭންޓިކް ކޮމެޑީ "ބޭޑް ނިއުސް" އިންނެވެ. މި އަހަރު ރިލީޒްވާން ހުރި ޓްރިޕްތީގެ އިތުރު ފިލްމުތަކުގެ ތެރޭގައި އައްލޫ އަރުޖުންގެ "ޕުޝްޕާ 2" އާއި ރާޖްކުމާރު ރާއޯގެ "ވިކީ ވިދިއާ ކާ ވޯ ވާލާ ވީޑިއޯ" އާއި ކާތިކް އާރިއަންގެ "ބޫލް ބުލައްޔާ 3" ގެ އިތުރުން ދަރުމާގެ "ދަޅަކް 2" ހިމެނެ އެވެ.
ރިޕޯޓްތައް ބުނާ ގޮތުން ޓްރިޕްތީ އާއި ކާތިކް މިހާރު ވަނީ އަނޫރާގް ބާސޫ ޑައިރެކްޓްކުރާ ފިލްމަކަށް ވެސް ސޮއިކޮށްފަ އެވެ. އެގޮތުން ލޯބީގެ ވާހަކައަކަށް ހަދާ ފިލްމުގެ ޝޫޓިން އޮގަސްޓް މަހުގެ ތެރޭގައި ފަށާނެ ކަމަށް މީޑިއާތަކުން ބުނެފައިވެ އެވެ.
ޓްރިޕްތީގެ އެކްޓިން ދަތުރުގެ ފެށުމަކީ ކުރީގެ ބަތަލާ ސްރީދޭވީގެ "މޮމް" ގައި ކުޅުނު ސަޕޯޓިން ރޯލެވެ. އަދު ލީޑް ކުޅުނު ފުރަތަމަ ފިލްމަކީ 2017 ގެ "ޕޯސްޓަރު ބޯއި" އެވެ. ޓްރިޕްތީ އަށް ގިނަ ބައެއްގެ ސަމާލުކަން ލިބުނީ 2020 ގެ ފިލްމު "ބުލްބުލް" އިންނެވެ.