ކުޅިވަރު މުބާރާތެއްގައި ބައިވެރިވެވަޑައިގެން ފިޖީގެ ބޮޑުވަޒީރު ސިޓިވެނީ ރަބޫކާ ބްރޯންޒް މެޑެލް ހޯއްދަވައިފި އެވެ.
އުމުރުން 75 އަހަރުގެ ބޮޑުވަޒީރު މެޑެލް ހޯއްދެވީ އޯޝަނިއާ އެތުލެޓިކްސް ޗެމްޕިއަންޝިޕްގައި ޝޮޓް ޕުޓްގައި ވާދަކުރައްވައިގެންނެވެ. ދަގަނޑު ބަރު ބޯޅަ އުކުމުގެ އިވެންޓްގެ 75-79 ކެޓަގަރީީގައި ވާދަކުރައްވައި ބޮޑުވަޒީރު ބްރޯންޒް މެޑެލް ހޯއްދެވީ އޮސްޓްރޭލިއާގެ ދެ މީހަކު ފަހަތަށް ޖައްސައިލުމަށް ފަހު އެވެ.
ރަބޫކާ ވަނީ 23 ފޫޓް (7.09 މީޓަރު) އަށް ބޯޅަ އުއްކަވައިފަ އެވެ. އޭނަ އަކީ 1974 ގައި ބޭއްވި ކޮމަންވެލްތު ގޭމްސްގައި ވެސް ޝޮޓް ޕުޓް އިން ފިޖީ ތަމްސީލު ކުރެއްވި އެތުލީޓެކެވެ.
މި މަހުގެ 1-7 އަށް ފިޖީގެ ސުވާގައި ކުރިއަށް ގެންދިޔަ އޯޝަނިއާ އެތުލެޓިކްސް ޗެމްޕިއަންޝިޕްގައި ވާދަކުރައްވައި ބޮޑުވަޒީރު މެޑެލް ހޯއްދެވި އިރު، ހިތްވަރު ދޭން އާއިލާގެ މީހުން ޖަމާވެފައި އޮތެވެ. އޭގެ ތެރޭގައި އަނބިކަނބަލުންނާއި ކާފަ އަދި މުނިކާފަ ދަރިން ހިމެނެ އެވެ.
މުބާރާތުގައި ލިބިވަައިގަތް ކާމިޔާބީއާ ގުޅިގެން ރަބޫކާ ފޭސްބުކް ޕޯސްޓެއްގައި ވިދާޅުވީ އުމުރުން އެހާ ދުވަސްވެފައި ހުއްޓައި ވެސް މުބާރާތެއްގައި ވާދަކޮށް މެޑެލްއެއް ލިބުމަކީ ވަރަށް ބޮޑު ކާމިޔާބީއެއް ކަމަށެވެ. އެހެންވެ ޒުވާން ޖީލަށް ދޭން އޮތް ނަސޭހަތަކީ ވެސް ދުޅަހެޔޮ ސިއްހަތަކަށްޓަކައި ހަރަކާތްތެރި ލައިފްސްޓައިލެއް ގެންގުޅުން ކަމަށް ވިދާޅުވި އެވެ.