މާލޭ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އިން ނަރުތަކެއް ވަގަށްނެގި ކަމަށް ތުހުމަތުކުރެވުނު ދެ މީހަކު ހައްޔަރުކޮށް ބަންދު މުއްދަތު ޖަހައިފިއެވެ.
މި މައްސަލައިގައި ހައްޔަރު ކޮށްފައިވަނީ 33 އަހަރު އަދި 43 އަހަރުގެ ދިވެހި ފިރިހެނުންނެވެ. މި މީހުންގެ ބަންދު މުއްދަތު ޖެހުމަށް ކްރިމިނަލް ކޯޓަށް ގެންގޮސްފައިވަނީ އިއްޔެއެވެ. މި މައްސަލައިގައި ހައްޔަރުކޮށްފައިވާ 33 އަހަރުގެ މީހާއަކީ ކުށުގެ ވެށީގައި އުޅޭ މީހެއްކަން ބަންދު އަމުރުގައި ފާހަގަ ކޮށްފައިވެއެވެ. އެގޮތުން ކުށުގެ ތުހުމަތުގައި އެކިފަހަރު މަތިން 44 ފަހަރަކު މީނާ ބަންދު ކޮށްފައިވާ ކަމަށާއި ހައްޔަރުކޮށް ބަންދު ކުރެވިފައިވާ މައްސަލަތަކުގެ ތެރޭގައި ވައްކަމުގެ މައްސަލަތައް ހިމެނޭކަން ފާހަގަ ކޮށްފައިވެއެވެ.
މި މީހުންގެ ބަންދު އަމުރުގައި ބުނެފައިވަނީ، އެމްޑަބްލިއުއެސްސީގެ އިމާރާތަށް ދެ މީހަކު ވަދެ ނަރުތަކެއް ވަގަށް ނަގައިގެން ދިޔަ ކަމަށް އެމްޑަބްލިއުއެސްސީގެ މުވައްޒަފަކު ފުލުހުންނަށް މައުލޫމާތު ދިންކަމަށެވެ. އަދި އެ ސަރަހައްދުގައި ހަރަކާތްތެރިވަމުންދިޔަ ފުލުހުންނަށް އެމްޑަބްލިއުއެސްސީ ގޭޓް ކައިރިން 2 މީހަކު ފެނުނުއިރު އެމީހުންގެ އަމަލުތައް ހުރިގޮތުން ކުށެއް ކޮށްފައިވާ ކަމަށް ތުހުމަތުކުރެވި އެ މީހުން ހުއްޓުވާ ސުވާލުކޮށް ހެދިކަމަށެވެ.
ފުލުހުން ކޯޓުގައި ބުނެފައިވަނީ މި މީހުން ހިނގާފައި އައި ސަރަހައްދު ފުލުހުން ބަލައި ފާސްކުރިއިރު އެ ސަރަހައްދުގައި ޕާކުކޮށްފައިއޮތް ޕިކަޕެއްގެ ފުރޮޅު މަތީން ހުދުކުލައިގެ ގޯންޏެއްގައި ގިނަ އަދަދެއްގެ ވައިރު ނަރު ހުރި ކަމަށެވެ. އެތަކެއްޗަކީ އެމީހުންގެ އެއްޗެއް ނޫންކަމަށް އެމީހުން ބުނެފައިވާކަމަށާއި އެހެންނަމަވެސް އެމްޑަބްލިއުއެސްސީގެ ސެކިއުރިޓީ އޮފިސަރު ސީނަށް ހާޒިރުވެ އެމްޑަބްލިއުއެސްސީން ވައްކަންކުރީ އެ ދެމީހުން ކަމަށާއި އެމަންޒަރު ކެމެރާތަކަށް ރެކޯޑް ކުރެވިފައި ހުރިކަމަށް ބުނެފައިވާކަން ކޯޓު އަމުރުގައި ފާހަގަ ކޮށްފައިވެއެވެ.
މި ދެމީހުން ކުށް ކުރިކަމަށް ތުހުމަތު ކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވާތީ ކޯޓުން ވަނީ އެ 2 މީހުންގެ ބަންދަށް 15 ދުވަސް ދީފައެވެ.