ފަހަކަށް އައިސް ރާއްޖޭގައި މިޔަރުގެ ފަރާތުން ބޮޑެތި ގެއްލުންތައްކާއި ހިތާމަވެރި ހާދިސާތައް އިތުރުވާތީ އެކަމަށް ހައްލެއް ހޯދަން ސަރުކާރުން މަސައްކަތްތަކެއް ކުރަމުން އަންނަ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ދުނިޔޭގެ ކަނޑުތަކުގެ ދުވަހާ ގުޅުވައިގެން ކުރިއަށް ގެންދިޔަ ހަރަކާތެއްގެ ތެރޭގައި މީޑިއާތަކާ ވާހަކަ ދައްކަވަމުން މިނިސްޓަރު ވިދާޅުވީ މިޔަރުގެ ސަބަބުން އެކި ކަހަލަ އުނދަގޫތަކާއި ބިރުވެރިކަމާ ކުރިމަތިވާކަމުގެ ޝަކުވާ ވަރަށް ގިނައިން ލިބެމުންދާ ކަމަށެވެ. ހާއްސަކޮށް މަސްވެރިންގެ ފަރާތުން އެ ޝަކުވާ އަންނަލެއް ގިނަ ކަމަށް މިނިސްޓަރު ވިދާޚުވި އެވެ. އެހެންވެ މައްސަލަ އަށް ހައްލެއް ހޯދުމަށްޓަކައި ސަރުކާރަށް ކުރެވެން ހުރި ކަންކަން ބަލަމުން އަންނަ ކަމަށެވެ.
މިދިޔަ ހަފުތާގައި މިޔަރަކު ދިން ހަމަލާއެއްގައި ސިފައިންގެ ޒުވާން އޮފިސަރަކު މަރުވެފައިވާ އިރު، ޑައިވިން އަށް ދާ މީހުންނާއި މަސްވެރިންނަށް ވެސް މިޔަރުގެ ބިރުވެރިކަމާ ވަރަށް ބޮޑަށް ކުރިމަތިލާން ޖެހިފައިވާ ކަމަށް އެ ދާއިރާތަކުގައި އުޅޭ ފަރާތްތަކުން ދަނީ ބުނަމުންނެވެ.
އެހެންވެ މިޔަރު ހިފަން ހުއްދަ ދޭން ވެސް ބައެއް މަސްވެރިން ގޮވާލާފައިވެ އެވެ. މަސްވެރިން ބުނާ ގޮތުގައި ރާއްޖޭގައި މިހާރު މިޔަރުގެ ނުރައްކާ އެހާ ބޮޑީ، މިޔަރުގެ އާބާދީ ވެސް ވަރަށް ބޮޑަށް އިތުރުވެފައިވާތީ އެވެ.