މި އަހަރުގެ ދުނިޔޭގެ ތިމާވެށީގެ ދުވަހާއި ދުނިޔޭގެ ކަނޑުތަކުގެ ދުވަހާ ގުޅުވައިގެން އެމްޑަބްލިއުއެސްސީން ކުރެހުމުގެ މުބާރާތެއް އިފްތިތާހުކޮށްފި އެވެ.
ސަލްޓަން ޕާކްކުގައި ރޭ ބޭއްވި ޚާއްސަ ރަސްމިއްޔާތެއްގައި މުބާރާތް އިފުތިތާހުކޮށް ދެއްވީ ޔޫތު މިނިސްޓަރު އިބްރާހީމް ވަހީދާއި ފެން ކުންފުނީގެ މެނޭޖިން ޑިރެކްޓަރު ޢަބްދުލް މަތީން މުޙައްމަދެވެ.
ނެޝަނަލް ސެންޓަ ފޯ ދި އާޓްސް (އެންސީއޭ) ގުޅިގެން ބާއްވާ މުބާރާތުގައި ބައިވެރިކުރާ ކުރެހުންތަކުން އެންމެ މޮޅު ތިން ކުރެހުމަކަށް ފައިސާގެ އިނާމު ދޭނެ އެވެ. އެގޮތުން އެއް ވަނަ އަށް 50،000ރ، ދެވަނަ އަށް 35،000ރ. އަދި ތިން ވަނަ އަށް 15،000ރ. ލިބޭނެ އެވެ.
މީގެ އިތުރުން އެންމެ މޮޅު ފަސް ކުރެހުން ވެސް ހޮވައި އެ ކުރުހުންތަކަށްވެސް ފައިސާގެ އިނާމު ލިބޭނެ އެވެ. އަދި އެ ފަސް ކުރެހުން ހޮވާނީ ދާނީ އާންމުންގެ މެދުގައި އެންމެ މަގުބޫލު ކުރެހުންތަކަށް ބެލުމަށް ފަހު އެވެ.
"ފެނުން ދިރުން" ކުރެހުމުގެ މުބާރާތް އިންސާފު ކުރާނީ އެންސީއޭ އިން އެކުލަވާލައިފައިވާ ކުރެހުމުގެ ދާއިރާއިން ފުންނާބު އުސް ފަނޑިޔާރުންގެ ޕެނަލްއަކުންނެވެ.
މުބާރާތުގައި ބައިވެރި ވުމުގެ ފުރުސަތު 18 އަހަރުން މަތީ ކޮންމެ މީހަކަށް ވެސް އޮންނާނެ އެވެ.
މިމުބާރާތުގައި ބައިވެރިކުރާ ކުރެހުންތަައް އާންމުންނަށް ދައްކާލުމަށްޓަކައި ނެޝަނަލް އާޓްސް ގެލަރީގައި ޚާއްސަ މައުރަޒެއް ވެސް ބާއްވަން ވަނީ ރާވައިފަ އެވެ. އެއީ އަންނަ މަހުގެ 27-30 އަށެވެ.
މުބާރާތުގަައި ބައިވެރިކުރާ ކުރެވޭ ކުރެހުންތައް ވިއްކަން ވެސް ހުޅުވައިލާނެ އެވެ. އެގޮތުން، ކޮންމެ ކުރެހުމެއްގެ އަގުގެ 15 ޕަސެންޓް ކުރެހުންތެރިޔާ އަށް ލިބޭނެ އެވެ. އަދި އަނެއް 85 ޕަސެންޓް ބޭނުން ކުރާނީ ކުރެހުންތެރިންގެ ނަމުގައި ރާއްޖޭގެ އެކި ކަންކޮޅުތަކުގައި ގަސް އިންދުމަށެވެ.