ސިވިލް ސާވިސްގެ މުވައްޒަފުނަކީ ހިނިތުންވުމާއި އޯގާތެރިކަމާއެކު ރައްޔިތުންނަށް ޚިދުމަތްދޭ ބަޔަކަށް ވުމަށް ނައިބު ރައީސް ހުސައިން މުހައްމަދު ލަތީފު އެދިވަޑައިގެންފި އެވެ.
ސިވިސް ސާވިސް ކޮމިޝަން (ސީއެސްސީ) އިން "ދިވެހި ސިވިލް ސާވިސް ކޮންފަރެންސް 2024" ގެ ނަމުގައި މިއަދު ފެށި ކޮންފަރެންސް އިފްތިތާހުކޮށް ދެއްވައި ނައިބު ރައީސް ވިދާޅުވީ އެ އިރަކު އޮންނަ ސަރުކާރަކުން އަމާޒު ހިފާ ކަންކަން ކުރުމަށާއި ރައްޔިތުންނަށް ވެފައިވާ ވައުދުތައް ފުއްދައި ދިނުމަށް މަސައްކަތްކުރާ އެއް ބަޔަކީ ސިވިލް ސާވިސްގެ މުވައްޒަފުން ކަމަށެވެ.
އަދި ރައްޔިތުންނަށް ޚިދުމަތްކުރުމަކީ ވަރަށް ކެތްތެރިކަމާ ކަމޭހިތުމާއެކު އަދާކުރަން ޖެހޭ ވަރަށް ބޮޑު ޒިންމާއެއް ކަމަށާއި ސަރުކާރުގެ ކޮންމެ ވުޒާރާއަކާ ކޮންމެ އޮފީހަކުން ވެސް ފަސޭހަކަމާ އެކު ޚިދުމަތް ލިބެން ކޮންމެ ރައްޔިތަކު ވެސް ބޭނުންވާނެ ކަމަށް ވިދާޅުވި އެވެ.
"ޚިދުމަތަކަށް ރައްޔިތަކު ދާއިރު އިސްތިގުބާލުކުރަން ތިބޭނީ ސިވިލް ސާވިސް މުވައްޒަފަކު. ރައްޔިތުންގެ އަޑު އަހަން، ސުވާލުތަކަށް ޖަވާބުދާރީވާން، ކަންކަން ފަހިކޮށްދޭން، ހަލުވިކޮށްދޭން، މަގުފަހިކޮށްދޭން ތިބޭނީ ހަމަ ސިވިލް ސާވިސް މުވައްޒަފުން،" އެ މަނިކުފާނު ވިދާޅުވި އެވެ. "އެހެންކަމުން ސަރުކާރެއް ހިންގުމަށް ސިވިލް ސާވިސް މުވައްޒަފުން ވަރަށް މުހިންމު ދައުރެއް އެބަ އަދާކުރޭ. ސިވިލް ސާވިސްގެ އެއްބާރުލުމާއި އެހީތެރިކަން ދިވެހި ސަރުކާރަށް ބޭނުންވޭ."
އެ ރަސްމިއްޔާތުގައި ނައިބު ރައީސް ވަނީ މައިގަނޑު ދެ ކަމެއް ކޮށް ދެއްވުމަށް ސިވިސް މުވައްޒަފުންގެ ކިބައިން އެދިވަޑައިގެންފަ އެވެ. އެއީ ޚިދުމަތް ހޯދުމަށް ދާ ކޮންމެ ދިވެހި ރައްޔިތަކާއި ބިދޭސީއަކަށް ވެސް ހިނިތުންވުމާއި އޯގާތެރިކަމާއެކު ޚިދުމަތް ދިނުމަށާއި ޓެކްނޮލޮޖީގެ އެހީގައި ހަލުވިކަމާއެކު އަވަސް ޚިދުމަތް ދިނުމެވެ.
ކޮންފަރެންސް ފަށަން ބޭއްވި ރަސްމިއްޔާތުގައި ނައިބު ރައީސް ވަނީ ދިވެހި ސިވިލް ސާވިސް ކޮންފަރެންސްގެ ފޮތް ވެސް ނެރެދެއްވައިފަ އެވެ.
މިއަދު ފެށި ކޮންފަރެންސް ނިންމައިލާނީ މާދަމާ އެވެ. މިއީ ސީއެސްސީގެ ހަތަރު ވަނަ ކޮންފަރެންސެވެ.