މި އަހަރުގެ މޯލްޑިވްސް ބްރޯޑްކާސްޓް އެވޯޑަށް ކުރިމަތިލުމުގެ ފުރުސަތު ހުޅުވާލައިފި އެވެ.
މޯލްޑިވްސް ބްރޯޑްކާސްޓިން ކޮމިޝަނުން ބުނީ އެވޯޑަށް ކުރިމަތިލުމުގެ ފުރުސަތު އަންނަ މަހުގެ 18 އާ ހަމައަށް ހުޅުވާލާފައިވާ ކަމަށެވެ.
މި އަހަރު އެވޯޑް ދޭން ހަމަޖެހިފައި ވަނީ ތިން ގެޓެގަރީ އަކުންނެވެ. އެއީ ޕްރޮޑަކްޝަން އެވޯޑް- ކެޓަގަރީ 1 އާއި އިންޑިވިޖުއަލް އެވޯޑް- ކެޓަަގަރީ 2 ގެ އިތުރުން އިންޑަސްޓްރީ އެވޯޑު- ކެޓަގަރީ 3 އެވެ.
އެ އެވޯޑަށް ހުށަހަޅާ ހުށަހެޅުންތަކަކ ޖެނުއަރީ 1، 2023 އިން ފެށިގެން ޑިސެމްބަރު، 31، 2023 އަށް ބްރޯޑްކާސްޓްކޮށްފައިވާ ކޮންޓެންޓަކަށް ވާން ޖެހޭނެ ކަމަށް ބްރޯޑްކޮމުން ބުންޏެވެ. އޭގެ ތެރޭގައި ނިއުސް ބުލެޓިން، ހަފުތާގެ ހަބަރުގެ ޕްރޮގްރާމް/ޝޯ، ވަގުތުން ގެނެސްދޭ ބްރޭކިން ނިއުސްގެ ރިޕޯޓު ނުވަތަ ވަކި މައުޝޫއަކަށް ގެނެސްދީފައިވާ ހަބަރުގެ ޕްރޮގްރާމު ހިމެނިދާނެ އެވެ.
ބްރޯޑްކާސްޓް އެވޯޑަކީ ރާއްޖޭގައި ޚިޔާލުފާޅުކުރުމުގެ މިނިވަންކަމާއި ޑިމޮކްރަސީ އާލާކޮށް ދަމަހައްޓާ އަދި ޤައުމުބިނާކުރުމާއި، އެކި ދާއިރާތަކުން ރައްޔިތުންގެ ހޭލުންތެރިކަން އިތުރުކޮށް މަޢުލޫމާތު މުއްސަނދި ކުރުމުގައި ބްރޯޑްކާސްޓިން ސިނާއަތުގައި ހަރަކާތްތެރިވާ ފަރާތްތަކުން އަދާކުރާ މުހިއްމު ދައުރުގެ އަގުވަޒަންކޮށް، އެ ސިނާޢަތުގެ ތަރައްޤީއަށް މަގުފަހިކޮށް ހިތްވަރު ދިނުމުގެ ގޮތުން ދޭ އެވޯޑެކެވެ.