ރައްޔިތުން ފާޅުކުރާ ޚިޔާލާއި އިއްވާ އަޑުތައް ސަރުކާރުގެ ވެރިންނަށް އިވޭ ކަމަށް ދިއްގަރު ދާއިރާގެ މެންބަރު އަދި މަޖިލީހުގެ ނައިބުރައީސް އަހުމަދު ނާޒިމް ވިދާޅުވެއްޖެއެވެ.
އިޒްރޭލުގެ ޕާސްޕޯޓު މަނާކުރުމަށް ހުށަހަޅާފައިވާ އިސްލާހަށް ވާހަކަ ދައްކަވަމުން ނާޒިމް ވިދާޅުވީ މީސްމީޑިއާގައި ރައްޔިތުން އަޑުއިއްވާއިރު އެ އަޑު ސަރުކާރުގެ ވެރިންނަށް ނީވޭ ކަމަށް ތުހުމަތު ކުރެވޭ ކަމަށެވެ.
"އަޅުގަނޑު ސާފުކޮށް ދަންނަވާލަން، ބޮޑުންނަށް ހުރިހާ އަޑެއްވެސް އިވޭ. އަޅުގަނޑުމެންނަކީވެސް ފެއްސާއި ރަތާއި ހުދުގެ ވިންދު އަޅުގަނޑުމެންގެ ހިތުގައި ޖަހާ ރައްޔިތުން." ނާޒިމް ވިދާޅުވިއެވެ.
ނާޒިމް ވިދާޅުވީ މިފަދަ މައްސަލަތަކުގައި ރަނގަޅު ނިންމުންތައް ނިންމުމުގެ ހިކުމަތްތެރިކަން މަޖިލީހުގެ މެންބަރުންގެ ހުންނާނެ ކަމަށެވެ. ނާޒިމް ވިދާޅުވީ ދިވެހިރާއްޖެ އަބަދުވެސް އޮންނަންވާނީ އަދި އޮންނާނީވެސް ދިވެހިރާއްޖޭގެ ފަރާތުގައި ކަމަށެވެ.
ރާއްޖޭގެ ގައުމިއްޔަތަށާއި ދިވެހި ރައްޔިތުންނަށް އެންމެ ފައިދާއާއި މަންފާވާ ގޮތަށް ކަންކަން ނިންމަންޖެހޭ ކަމަށާއި އަދި މަޖިލީހުން ކަންކަން ނިންމާނީވެސް އެގޮތަށް ކަމަށް ވިދާޅުވިއެވެ. އަދި އިޒްރޭލު ޕާސްޕޯޓް މަނާކުރުމަށް ހުށަހަޅާފައިވާ އިސްލާހުވެސް މިކަމުގައި އިސްތިސްނާ ނުވާ ކަމަށް ވިދާޅުވިއެވެ.
ނާޒިމް މަޖިލީހުން މިކަމުގައި ނިންމާ ނިންމުމަކީ ޖުމުލަ ގޮތެއްގައި ރާއްޖޭގެ މިނިވަންކަމާއި ރައްކާތެރިކަމާއި އަދި އިގްތިސާދީ ގޮތުންވެސް ގެއްލުން ނުވާނެ ގޮތްތަކަކަށް ނިންމާ ނިންމުމަކަށް ވާންވާނެ ކަމަށެވެ. އަދި މިކަމުގައި ނިންމާ ނިންމުމަކުން އަންނާނެ އިމްޕެކްޓްގެ އެސެސްމެންޓެއް ކޮމިޓީން ހެދުމަކީ މުހިންމު ކަމެއް ކަމަށް ވިދާޅުވިއެވެ.