ސަރުކާރުގެ ހިޔާވަހި ފައިނޭންސިން ސްކީމުގެ ބައިވެރިއެއްގެ ގޮތުގައި ހައުސިން މިނިސްޓްރީއާ އެކީ މޯލްޑިވްސް އިސްލާމިކް ބޭންކް (އެމްއައިބީ) އިން އެމްއޯޔޫއެއްގައި ސޮއިކޮށްފި އެވެ.
މިނިސްޓްރީގައި އިއްޔެ ބޭއްވި ރަސްމިއްޔާތުގައި ހައުސިން މިނިސްޓްރީގެ ފަރާތުން ސޮއި ކުރެއްވީ ހައުސިން މިނިސްޓަރު ޑރ. އަލީ ހައިދަރެވެ. އެމްއައިބީގެ ފަރާތުން ސޮއިކުރެއްވީ ސީއީއޯ މުފައްޒަލް އިދްރީސް ހުމްރީއެ ވެ.
މިނިސްޓަރު ވިދާޅުވީ މިފަދަ ލޯން ސްކީމެއްގެ ދަށުން ރައްޔިތުންނަށް އެހީތެރިކަން ފޯރުކޮށް ދިނުމުގައި އެމްއައިބީއިން ބައިވެރިވުމަކީ ވަރަށް ބޮޑު އުފަލެއް ކަމަށެވެ. އަދި މި ލޯން ފޯރުކޮށް ދިނުމުގައި އެމްއައިބީއިން މަސައްކަތް ކުރާނީ އެސްޑީއެފްސީއާ އެކީ ލަމ ކަމަށް ވެސް މިނިސްޓަރު ވިދާޅުވި އެވެ.
"ރައީސްގެ ވައުދު ފުޅެއް ފަސް ޕަސެންޓު ނުވަތަ އެއަށް ވުރެ ދަށުގައި އިންޓްރެސްޓު ބަހައްޓައިގެން ދިގު މުއްދަތުން ދައްކާ ލުއި ލޯނު ސްކީމެއް ތައާރަފް ކުރުމަކީ." ހައިދަރު ވިދާޅުވި އެވެ.
އެމްއައިބީގެ ސީއީއޯ މުފައްޒަލް ވިދާޅުވީ ސަރުކާރުން ރައްޔިތުންނަށް ފޯރުކޮށްދޭ ބޮޑު ޚިދުމަތެއްގައި ބައިވެރިވުމުގެ ފުރުސަތު ލިބުމަކި އެމްއައިބީ އަށް ފަހުރެއް ކަމަށެވެ. އަދި ރައްޔިތުންނަށް އެންމެ ފަސޭހައިން ލޯނުތައް ލިބޭނެ އިންތިޒާމު ހަމަޖައްސަވައި ދެއްވުމަށް މަސައްކަތް ކުރައްވާނެ ކަމަށް ވިދާޅުވި އެވެ.
ސްކީމްގެ ދަށުން ދެ ކެޓަގަރީއަކުން ލޯނު ދޫކުރަން ހަމަޖެހިފައިވެ އެވެ. އެއީ މާލެ ސަރަހައްދާއި އާބަން ސެންޓަރުތަކަށް ހާއްސަކޮށްގެން ދޫކުރާ ލޯންގެ އިތުރުން އެ ނޫން ސަރަހައްދުތަކުގައި ދިރިއުޅޭ މީހުންނަށް ދޫކުރާ ލޯން ކެޓަގަރީއެވެ. މާލެ ސަރަޙައްދާއި އާބަން ސެންޓަރުތަކަށް ލޯނު ދޫކުރަން ހަމަޖެހިފައި ވަނީ 3 މިލިއަން ރުފިޔާއާ ހަމައަށެވެ. އަދި އެ ނޫން ސަރަހައްދުތަކަށް ދޫކުރާނީ 1 މިލިއަން ރުފިޔާގެ ލޯނެވެ.
ދެ ކެޓަގަރީން ވެސް ލޯން ދައްކައި ހަލާސްކުރަން 25 އަހަރުގެ މުއްދަތެއް ލިބޭނެ އެވެ.