އިޒްރޭލު ޕާސްޕޯޓު މަނާކުރަން އެމްޑީޕީގެ މެންބަރަކު އިސްލާހު ހުށަހެޅީ ރައީސް ޑރ. މުހައްމަދު މުއިއްޒުގެ ވެރިކަން ނިމުމަކަށް ގެނައުމަށް ކަމަށް މާމިގިލީ ދާއިރާގެ މެންބަރު އަދި ޖޭޕީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
އިޒްރޭލުގެ ޕާސްޕޯޓު މަނާކުރުމަށް ހުށަހަޅާފައިވާ އިސްލާހަށް ވާހަކަ ދައްކަވަމުން ޤާސިމް ވިދާޅުވީ އިޒްރޭލުގެ ޕާސްޕޯޓް އޮތް މީހަކަށް ރާއްޖެ ނާދެވޭގޮތަށް ނިންމަން އުޅޭއިރު އެ ބުނެވެނީ ޔަހޫދީންނަށް ރައްޖެ ނާދެވޭގޮތަށް ނިންމަން އުޅޭ ވާހަކަ ކަމަށެވެ.
"އެއީ [ޔަހޫދީންނަކީ] ﷲ ބާއްވާލައްވާފައިވާ ދީނެއްގައި ރަސޫލުންނަށް އީމާންވެފައިވާ ބަޔަކަށް ވާހިނދު، އަޅުގަނޑުމެނަށް އެފަދަ ކަމެއް ކުރުމުގެ ފުރުސަތާމެދު ވަރަށް ފުންކޮށް އެ ނަޒަރިއްޔާތުން ވިސްނަންޖެހޭނެ. އެކަމާމެދު ވަރަށް ފިކުރުވެރިކަމާއެކު ވިސްނަންޖެހޭނެ. އެއީ އެއްގޮތަކަށްވެސް އަޅުގަނޑުމެން ފަލަސްތީނުގެ ރައްޔިތުންނަށް ލިބެމުންދާ އަނިޔާވެރިކަމާ ނިކަމެތިކަން އަޅުގަނޑުމެންގެ ހިތަށް ނުގެންނާތީއެއް ނޫން." ޤާސިމް ވިދާޅުވިއެވެ.
ޤާސިމް ވިދާޅުވީ މަޖިލީހުގައި ތިބީ ރައްޔިތުން އިންތިހާބުކޮށްގެން ހޮވާފައިތިބި މެންބަރުން ކަމަށާއި މި މަޖިލީހުގެ ނިންމުން ވާންވާނީ ދިވެހިރާއްޖޭގެ މުސްތަޤުބަލަށާއި ސަލާމަތްކަމާއި ރައްކާތެރިކަމަށް ވިސްނައިގެން ނިންމާ ނިންމުމަކަށް ކަމަށެވެ. އަދި ސަލާމަތުން ތިބެގެން މެނުވީ އެއްވެސް ކަމެއް ނުކުރެވޭނެ ކަމަށާއި މިކަމުގައި ފިޔަވަޅެއް އަޅަންވާނީ ވަރަށް ކެތްތެރިކަމާއެކު ކަމަށެވެ.
މީކާއިލް މި އިސްލާހު މަޖިލީހަށް ހުށަހަޅުއްވަމުން ދެއްކެވި ވާހަކަތަކާ ދެކޮޅު ހައްދަވާކަން ފާހަގަ ކުރައްވާ ޤާސިމް ވިދާޅުވީ އެކަމާމެދު ދިރާސާކުރަންވީ ވަރަށް އަދި ވިސްނަންވީވަރަށް މެންބަރު މީކާއިލް ވިސްނާފައި ނެތްކަމަށެވެ.
"އަޅުގަނޑު ގަބޫލުކުރާ ގޮތުގައި ސިޔާސީ ގޮތުން ޕީއެންސީގެ ވެރިކަން ނިމުމަކަށް ގެނައުމަށްޓަކައި، ރައްޔިތުންގެ ހިތުގައި ނަފުރަތު އުފެއްދުމަށްޓަކައި ހުށަހެޅިފައިވާ މައްސަލައެއް ކަމުގައި އަޅުގަނޑު ދެކޭތީ އެވާހަކަ ދަންނަވާލަން." ޤާސިމް ވިދާޅުވިއެވެ.
ރާއްޖެއަށް އިޒްރޭލުގެ ރައްޔިތުން އައުން މަނާކުރަން އެމްޑީޕީގެ މެންބަރު މީކާއިލް އަހުމަދު ނަސީމް އިސްލާހު ހުށަހަޅާފައިވަނީ އިމިގްރޭޝަންގެ ގާނޫނަށެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި އިސްލާހުގެ ބަހުސް ކުރިއަށް ގެންގޮސްފައެވެ.