ބޮލީވުޑްގެ މަޝްހޫރު ތަރި ރިތިކް ރޯޝަން ޕްރެޒެންޓްކޮށްދޭ ފިލްމެއް މި މަހުގެ 21 ގައި ސިނަމާތަކަށް ގެންނަން ނިންމައި، އޭގެ ޓްރެއިލާ މިއަދު ދައްކާލައިފި އެވެ.
އެކްޓިން ކޯޗެއް ކަމަށްވާ ވިނޯދު ރަވަތު ޑައިރެކްޝަނަށް ނުކުތް މި ފިލްމަކީ "ޕުޝްތައިނީ" އެވެ. ފިލްމުގެ ސްކްރީންޕްލޭގައި މީގެ މުހިއްމު ރޯލެއް ވެސް ކުޅެފައިވާ ރީޓާ ހީރް ހިއްސާވާ އިރު، މީގެ ހާއްސަ ފެނިލުމެއްގައި ކުޅަދާނަ އެކްޓަރު ރާޖްކުމާރު ރާއޯގެ ވެސް ހިމެނެ އެވެ.
ރާޖްގެ އެންމެ ފަހުގެ ފިލްމަކީ މިދިޔަަ މަހުގެ 31 އިން ފެށިގެން ސިނަމާތަކުގައި ދައްކަމުން އަންނަ ކަރަން ޖޯހަރްގެ ދަރުމާ ޕްރޮޑަކްޝަންގެ "މިސްޓަ އެންޑް މިސިޒް މާހީ" އެވެ.
"ޕުޝްތައިނީ" އަކީ ލޮޓަސް ޑަސްޓް ޕިކްޗާސް އާއި ވިން ރޯ ފިލްމްސް ގުޅިގެން ގެނެސްދޭ ފިލްމެކެވެ. މީގައި ރިތިކް ހިއްސާވި އިރު، އޭނަގެ އެންމެ ފަހުގެ ފިލްމަކީ ޖެނުއަރީގައި ރިލީޒްކުރި "ފައިޓާ" އެވެ.
"ޕުޝްތައިނީ" ގައި ހިއްސާވާން ނިންމި ސަބަބު އިންސްޓަގްރާމް ޕޯސްޓެއްގައި ފިލްމުގެ ޓްރެއިލާއާ އެކީ ރިތިކް ވަރަށް ތަފުސީލުކޮށް ކިޔައި ދީފައިވެ އެވެ.