ބޮލީވުޑްގެ މަޝްހޫރު ބަތަލާ ކާޖޮލްގެ ފުރަތަމަ ވެބް ސީރީޒް "ދަ ޓްރަޔަލް" ގެ ރޯލެއް ކުޅުނު ބަތަލާ ނޫރު މަލަބިކާ ދާސް މަރުވެއްޖެ އެވެ.
މީޑިއާތަކުން ބުނީ 37 އަހަރުގެ ބަތަލާ މަރުވެފައި އޮއްވައި ފެނުނީ ލޯކަންދުވާލާގައި އޭނަ އުޅެމުން އައި އެޕާޓްމަންޓްގެ ތެރޭގައި ކަމަށެވެ. ނޫރު މަރުވިކަން އެނގުނީ އެޕާޓްމަންޓް ދިމާލުން ކުނިވަސް ދުވާތީ އަވައްޓެރިންގެ ބަޔަކު އެކަން ކަމާބެހޭ ފަރާތްތަކަށް ރިޕޯޓްކޮށް، ފަހުން ފުލުހުން އައިސް އެޕާޓްމަންޓަށް ވަދެ ބެލި އިރު އެވެ.
ފުލުހުން ބުނެފައި ބަނީ މިހާތަނަށް ބެލިބެލުމުން އޭނަ މަރުވި ކަމަށް ބެލެވެނީ މީގެ ހަތަރު ވަރަކަށް ދުވަސް ކުރިން ކަމަށާއި މަރުވި ކަމަށް ބެލެވެނީ އަމިއްލަ އަށް ކަމަށެވެ.
މި ހާދިސާ މިހާރު އެކްސިޑެންޓަލް ޑެތު ރިޕޯޠް (އޭޑީއާރް) ގެ ގޮތުގައި ރިޕޯޓްކޮށް، ހަށިގަނޑު އޮޓޮޕްސީ ހަދަން ވަނީ ނިންމައިފަ އެވެ.
އާސަމަށް އުފަން ނޫރް ރޯލެއް ކުޅުނު ކާޖޮލްގެ "ދަ ޓްރަޔަލް" އަކީ މިދިޔަ އަހަރު ޑިޒްނީ ޕްލަސް ހޮޓްސްޓާ އިން ގެނެސްދިން ސީރީޒެކެވެ. އޭނަ ކުރިން ގަތަރު އެއާވޭސްގެ ކެބިން ކްރޫއެއްގެ ގޮތުގައި ވެސް މަސައްކަތްކުރި އެވެ.