މަގުމަތިން މިލިއަނަކށް ވުރެ ގިނަ ރުފިޔާ ފޭރުނު މީހަކު ފަސް އަހަރަށް ޖަލަށްލާން ހުކުމްކޮޑްފި އެވެ.
ކްރިމިނަލް ކޯޓުން އިއްޔެ އެ ހުކުމް އިއްވާފައި ވަނީ ގ. ހިޔަރޯދި މުހައްމަދު ޝަމްއާން ސަލީމްގެ މައްޗަށެވެ.
މީގެ ތިން އަހަރު ކުރިން އޮގަސްޓް 2021 ގައި މަނީ އެކްސްޗޭންޖް ކުންފުންޏެއްގެ މުވައްޒަފުންތަކެއް މަގުމަތިން ދަނިކޮށް ވަޅިން ބިރު ދެއްކުމަށް ފަހު ނުވަ ލައްކަ ރުފިޔާ އާއި 27،000 ޑޮލަރު (ހަތަރު ލައްކަ ރުފިޔާ) ފޭރުނު މައްސަލާގައި ދައުލަތުން ދެެ މީހަކަށް ދައުވާކުރި އެވެ.
ހުކުމުގައި ބުނީ ޝަމްއާން އިތުރު މީހަކާ އެކީ ސައިކަލެއްގައި ގޮސް ފައިސާ ދަބަސް ފޭރުނު އިރު، ސައިކަލް ދުއްވަން އިނީ އޭނަ ކަން ހެކިންގެ ބަހުން އެނގޭ ކަމަށެވެ. ދައުލަތުން ހުށަހެޅި ވީޑިއޯ ފުޓޭޖްތަކުން ވެސް އެކަމަށް ބާރު ދޭތީ އޭނަގެ މައްޗަށް ކުށް ސާބިތުވާ ކަމަށް ހުކުމުގައިވެ އެވެ.
ގާޒީ އަލީ އާދަމް އިއްވި ހުކުމުގައި ވަނއެ ކުށުގެ އަސްލު އަދަބަކީ 8 އަހަރަށް ޖަަލަށްލުން ކަމަށް ވިޔަސް، ޝަމްއާން އެ މައްސަލާގައި ދެ އަހަރާއި 10 މަސް ދުވަސް ބަންދުގައި ހޭދަކޮށްފައިވާތީ އެ ބައި ހުކުމުގެ މުއްދަތުން އުނި ކުރުމަށް ފަހު ފަސް އަހަރާއި އެއް މަހަށް އޭނާ ޖަލަށް ލާން ހުކުމްކުރީ ކަމަށެވެ.