ގިނަ ބަޔަކު ވަރަށް ބޮޑަށް އިންތިޒާރު ކުރަމުން އަންނަ ޕްރަބާސް އާއި ދީޕިކާ ޕަދްކޯންގެ ފިލްމު "ކަލްކީ: 2898 އޭޑީ" ގެ ޓްރެއިލާ މިއަދު ދައްކާލައިފި އެވެ.
ބެލުންތެރިން މުޅިން ތަފާތު ދުނިޔެއަކަށް ގެންގޮސްދޭނެ އަދި އިންޑިއާގެ ސިނަމާ އަށް މުޅިން އާ ރަހައެއް ލައްވައި ދޭނެ މި ފިލްމަކީ ކުޅަދާނަ ތެލެގޫ ޑައިރެކްޓަރު ނާގް އަޝްވިން ލިޔެ، ޑައިރެކްޓްކޮށްފައިވާ ސައިންސް ފިކްޝަން އެކްޝަން ފިލްމެކެވެ.
ކާސްޓްގައި އަމީތާބް ބައްޗަނާއި ޑިޝާ ޕަޓާނީގެ އިތުރުން ކަމަލް ހަސަން ވެސް ހިމެނޭ މި ފިލްމަކީ ޖުމްލަ 600 ކްރޯޑް ރުޕީސް (72 މިލިއަން ޑޮލަރު) ގެ ބަޖެޓަކުން ހަދާފައިވާ ފިލްމެވެ.
ފިލްމުގެ ޝައުގުވެރިކަން ބޮޑުކޮށް ދިން ޓްރެއިލާ އަށް ގިނަ ބަައެއްގެ ސަމާލުކަން ލިބިފައިވާ އިރު، "ކަލްކީ" ސިނަމާތަކަށް ދޫކޮށްލަން ހަމަޖެހިފައި ވަނީ މި މަހުގެ 27 ގަ އެވެ.
މިއީ "ބާހްބަލީ" އިން ބޮޑު މަޝްހޫރު ކަމެއް ލިބުނު ޕްރަބާސްއާ އެކީ ދީޕިކާ ކުޅުނު ފުރަތަމަ ފިލްމަށްވާތީ މިއީ ފިލްމަށް ވަރަށް ގިނަ ބަޔަކު އިންތިޒާރު ކުރަމުން އަންނަ ވަރަށް މުހިއްމު ސަބަބެކެވެ.
"ކަލްކީ" ބެލުންތެރިންނަށް ދޫކޮށްލަން ގާތްވަމުން އަންނަ އިރު، އެކްޓަރު ރަންވީރު ސިންގްއާ ކައިވެނިކޮށްގެން އުޅޭ ބަތަލާ މިހާރު އިނީ އަލަތު ދަރިފުޅަށް ބަލިވެ އެވެ. "ކަލްކީ" އަކީ މި އަހަރު ރިލީޒްވާ ދީޕިކާގެ ދެވަނަ ފިލްމެވެ. ފުރަތަމަ ފިލްމަކީ ޖެނުއަރީގައި ގެނެސްދިން ރިތިކް ރޯޝަންގެ "ފައިޓާ" އެވެ.