އައްޑޫ ހުޅުދު އާއި މީދޫން ހިތަދު އަށް ރުއްތަކެއް ހަދިޔާކޮށްފި އެވެ.
ހިތަދޫ އަވަށު އޮފީހުން ބުނީ ރުއްތައް ހަދިޔާކުރީ މީދޫ ދީނާރު، ޢަބްދުﷲ ނަސީރާއި ހުޅުދޫ އަވަށު އޮފީހާއި ހުޅުދޫ އަންހެނުންގެ ގުޅުން (ހުއަނގު) ޖަމްޢިއްޔާ އިން ކަމަށެވެ.
އެގޮތުން އެ ފަރާތްތަކުން ވަނީ ހިތަދޫ އަވަށު އޮފީހަށް 100 ރުކާއި 50 ކާށީގެ އިތުރުން 50 އަލަނާސި ގަސް ވެސް ހަދިޔާކޮށްފަ އެވެ.
ހުޅުދު އާއި މީދޫން ހިތަދު އަށް ރުއްތަކެއް ހަދިޔާ މިކުރީ މި މަހުގެ 5 ގައި ފާހަގަކުރި ދުނިޔޭގެ ތިމާވެށީގެ ދުވަހާ ގުޅިގެން އައްޑޫގެ ހުރިހާ އަވަށެއްގައި ރުއް އިންދުމުގެ ޕްރޮގްރާމެއް ކުރިއަށް ގެންގޮސްފައި ވަނިކޮށެވެ.
އެގޮތުން މި ފަހަރުގެ ތިމާވެށީގެ ދުވަހާ ގުޅުވައިގެން އައްޑޫގައި 1،000 ރުއް އިންދުމުގެ މަސައްކަތް ކައުންސިލުން އިސްކޮށް އޮވެގެން ފެށި އެވެ.
އައްޑޫގެ މަލަމަތި ރީތިކުރުމަށްޓަކައި މިދިޔަ އަހަރު ކަދުރު ރުއްތަކެއް އިިންދުމުގެ ޕްރޮގްރާމެއް ވެސް ކައުންސިލުން ކުރިއަށް ގެންގޮސްފައިވާ އިރު، 2021 ގައި އައްޑޫގައި 100،000 ދިވެހި ރުއް އިންދުމުގެ ޕްރޮގްރާމެއް ވެސް ފެށި އެވެ.
ހިތަދު އަށް ރުއް ހަދިޔާ ކުރުމަށް ޝައުގުވެރިވާ ފަރާތްތަކަށް އެ ފުރުސަތު މިހާރު ވެސް އޮތީ ހުޅުވާލައިފަ އެވެ. މިކަމާ ގުޅޭ މައުލޫމާތު މި ވައިބަ ނަމްބަރު އިން 7385753 ސާފު ކުރެވޭނެ އެވެ.