ދެހާސް ބާވީހުގެ ފައިދާ އިން ހިއްސާއަކަށް ހަތަރު ރުފިޔާ އަލުން ބަހަން އެމްޓީސީސީން ފާސްކޮށްފި އެވެ.
އެ ކުންފުނިން އެގޮތަށް ފާސްކުރީ ރޭ އޮންލައިންކޮށް ބޭއްވި އެކްސްޓްރާއޯޑިނަރީ ޖެނެރަލް މީޓިން (އީޖީއެމް) ގަ އެވެ. އެ ޖަލްސާގައި ބަހަން ނިންމީ ހިއްސާގެ މޫނުމަތީ އަގު 5ރ. އާއި ޑިވިޑެންޑަށް 4ރ. އެވެ. އެއީ 2021 ވަނަ އަހަރުގެ އަދަދަށް ވުރެ 50 ލާރި އިތުރު އަދަދެކެވެ.
މިއީ އެމްޓީސީސީން މިހާތަނަށް ބަހާ އެންމެ ބޮޑު އަދަދަށް ވިޔަސް މިދިޔަ އަހަރުގެ ޖޫން މަހު ބޭއްވި އަހަރީ އާންމު ޖަލްސާގައި އެ އަދަދު ބަހަން ފާސްވެފައެއް ނުވެ އެވެ. ޑިވިޑެންޑް ބެހުމާ ދެކޮޅަށް، އެ ފަހަރުގެ ޖަލްސާގައި ބައިވެރިވި ހިއްސާދާރުންގެ ތެރެއިން 61 މީހުން ވޯޓު ދިނެވެ. އެއީ ވޯޓުގައި ބައިވެރިވި މީހުންގެ 53 ޕަސެންޓެެވެ.
އެމްޓީސީސީ އަށް 2022 ގައި ސާފު ފައިދާގެ ގޮތުގަައި ޓެކްސް ކަނޑާލައި 196 މިލިއަން ރުފިޔާ ލިބިފައިވެ އެވެ. މިއީ އޭގެ ކުރީ އަހަރަށް ވުރެ 36 މިލިއަން ރުފިޔާ ދަށް އަދަދެކެވެ.