ބޮލީވުޑްގެ ބަތަލާ ސޮނާކްޝީ ސިންހާ މި މަހު ކައިވެނި ކުރަން ނިންމާފައިވާ ކަމަށް ބުނެ ވާހަކަ ދެކެވެމުންދާތީ އެ ވާހަކަތަކަށް އޭނަ ރައްދު ދީފި އެވެ.
ރިޕޯޓްތައް ބުނާ ގޮތުން ސޮނާކްޝީ އާއި އެކްޓަރު ޒަހީރު އިގްބާލް ކައިވެނި ކުރަން ނިންމާފައި ވަނީ މި މަހުގެ 23 ގަ އެވެ.
މިކަމާ ބެހޭ ގޮތުން އައިޑީވާގައި ވާހަކަ ދައްކަމުން ސޮނާކްޝީ ބުނީ އޭނަގެ ކައިވެންޏަކީ އެއްވެސް ބަޔަކާ ބެހޭ ކަމެއް ނޫން ކަމަށެވެ.
"ފުރަތަމަ ކަމަކަށް އެއީ އެއްވެސް ބަޔަކާ ބެހޭ ކަމެއް ނޫން. ދެވަނަ ކަމަކަށް ކައިވެނި ކުރުމާއި ނުކުރުން އަހަރެންގެ އަމިއްލަ އިހުތިޔާރުގައި އޮތް ކަމެއް." 2010 ގެ "ދަބަންގް" އިން ބޮލީވުޑަށް ނުކުތް ބަތަލާ ބުންޏެވެ. "އަހަރެންގެ މައިންބަފައިން އަހަރެންގެ ކައިވެންޏާ ބެހޭ ގޮތުން ސުވާލު ނުކުރާ ވަރަށް މިހާރު ކަމާ ނުބެހޭ މީހުން ސުވާލު ކުރާލެއް މާ ގިނަ. މިކަން އަަސްލު އަހަންނަށް މިހާރު ވަނީ ބޮޑު ޖޯކަކަށް."
އެހެންވެ މިހާރު އެފަދަ ވާހަކަތަކަށް މާ ބޮޑު ސަމާލުކަމެއް ވެސް ދޭން ބޭނުން ނުވާ ކަމަށް ސޮނާކްޝީ ބުންޏެވެ.
ސޮނާންޝީ، 37، އާއި ޒަހީރު، 33، ރައްޓެހިވެގެން އުޅޭކަން ކަށަވަރުކޮށް ދިނީ 2022 ގަ އެވެ. މީގެ ދެ ދުވަސް ކުރިން ގިނަ މީޑިއާތަކުން ރިޕޯޓްކޮށްފައިވާ ގޮތުގައި މި މަހުގެ 23 ގައި ކައިވެނީގެ ހަފުލާ ބާއްވަން ނިންމާފައިވާތީ އެކަމުގެ ތައްޔާރީތައް ދެ ފަރާތުގެ އާއިލާ އިން އަންނަނީވަމުންނެވެ.
ބައެެއް މީޑިއާތަކުން ބުނީ ސޮނާކްޝީ ކައިވެނީގެ ހަފުލާ ވާނީ މާ ކަންތައްގަނޑު ބޮޑު ނޫން ސާދާ ހަފުލާއަކަށެވެ.
މި ކައިވެނި ކުރަން އުޅޭ ކަމަށް ބުނާ ތާރީހު ގާތްވަމުން އަންނަ އިރު، ސޮނާކްޝީގެ ބައްޕަ ކުރީގެ އެކްޓަރު ޝަތުރުގަން ސިންހާ އާއި ބޭބެ ލަވް ސިންހާއާ މީޑިއާތަކުން ސުވާލުކުރުމުން އެކަމާ ބެހޭ ގޮތުން ވާހަކަ ދައްކަން ދެކޮޅު ހަދާފައިވެ އެވެ. ސަތަރޭ ބުނެފައި ވަނީ ދަރިފުޅުގެ ޕްލޭންތަކުގެ ވާހަކަ އަމިއްލަ އަށް ދައްކައި ނޫޅޭ ކަމަށެވެ.
މިހާތަނަށް ބޮލީވުޑުން އެއްވެސް ކުރިއެރުމެއް ހޯދިފައި ނުވާ ޒަހީރު ބޮލީވުޑަށް ނުކުތީ ސަލްމާން ޕްރޮޑިއުސްކުރި 2019 ގެ ފިލްމު "ނޯޓްބުކް" އިންނެވެ. އޭނަ އާއި ސޮނާކްޝީ އެކީގައި ފިލްމަކާއި ވީޑިއޯ ލަވައެއް ކުޅެފައިވެ އެވެ.