ފަލަސްޠީނަށް އެހީވުމަށް އދގެ ރިލީފް ފަންޑަށް ދިވެހި ސަރުކާރުން ކޮންމެ އަހަރަކު ދެމުން އަންނަ ފައިސާގެ އެހީ 50،000 ޑޮލަރަށް އިތުރުކުރަން ނިންމާފައިވާ ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.
ފަލަސްތީނަށް އެހީވާން ދައުލަތުގެ މީޑިއާ ޕީއެސްއެމުން އިންތިޒާމުކޮށްގެން މިއަދު ހެނދުނު "ފަލަސްތީނާ އެކީ ދިވެހިން" ގެ ނަމުގައި ފެށި ޓެލެތޯންގައި ވާހަކަ ދައްކަވަމުން މިނިސްޓަރު ވިދާޅުވީ ފަލަސްތީނަށް އެހީވުމަށް އުފައްދާފައިވާ ޔޫއެންގެ ރިލީފް އެންޑް ވޯކްސް އެޖެންސީ ފޯ ފަލަސްތީން ރެފިއުޖީސް "އަންރުވާ" އަށް ސަރުކާރުން ދޭ އެހީ 5،000 ޑޮލަރުން 50،000 ޑޮލަރަށް އިތުރު ކުރަން ނިންމާފައިވާ ކަމަށެވެ.
"ރާއްޖެއިން މިހާތަނަށް ދެމުން އައީ އަހަރަކު ފަސްހާސް ޑޮލަރު. އެކަމަކު މިދިޔަ އަހަރުގެ އޮކްޓޯބަރު ހަތަކުން ފެށިގެން އިޒްރޭލުން ފަލަސްތީނާ ދެމުންދާ ޙަމަލާތަކާ ގުޅިގެން، މިއަހަރު ރާއްޖެއިން އެހީގެ ގޮތުންގައި ފަންސާސްހާސް ޑޮލަރު ދޭން ވަނީ ނިންމާފައި،" މިނިސްޓަރު ވިދާޅުވި އެވެ. " އެއީ މިހާރު ދޭ މިންވަރަށް ވުރެ ދިހަ ގުނަ އިތުރު އަދަދެއް."
ޒަމީރު ވިދާޅުވީ އެ ފައިސާ ހަވާލު ކުރާނީ ފިނޭންސް މިނިސްޓްރީ އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް، ފޮރިން މިނިސްޓްރީގެ ބެލުމުގެ ދަށުން ކަމަށެވެ. އަދި އެ މަސައްކަތް ކުރިއަށް ގެންދިއުމަށްޓަކައި "ކްރޯ މޯލްޑިވްސް އެލްއެލްބީ" ކިޔާ މިނިވަން އޮޑިޓަރެއް ހަމަޖައްސާފައިވާ ކަމަށް ވެސް ވިދާޅުވިއެވެ.
މިހާރު ކުރިއަށް ގެންދާ ޓެލެތޯންގައި ލިބޭ ފައިސާ ވެސް ފަލަސްޠީނަށް ހަވާލުކުރުމުގެ މަސައްކަތް ކުރިއަށް ގެންދާނީ މިނިސްޓްރީ ސީދާ އަންރުވާއަށެވެ.