ދެކުނު ކޮރެއާ އިން އެތެރެކޮށްގެން ޑެންމާކްގައި ވިއްކަމުން އައި ކޮރެއާގެ ނޫޑްލްސް ބްރޭންޑެއްގެ ތިން ބާވަތެއް މާ ބޮޑަށް ކުޅި ގަދަ ކަމަށް ބުނެ އެ ނޫޑުލްސް ނުކާން އަންގައިފި އެވެ.
އެގޮތުން ނުކާން އަންގާފައި ވަނީ ދެކުނު ކޮރެއާގެ ސެމްޔަންގު ކުންފުނީގެ "ބުލްޑަކް" ބްރޭންޑްގެ ނޫޑްސްގެ ތިން ރަހައެކެވެ. އެއީ ބުލްޑަކް ތުރީޓައިމްސް ސްޕައިސީ އެންޑް ހޮޓް ޗިކެން އާއި ޓޫޓައިމްސް ސްޕައިސީ އެންޑް ހޮޓް ޗިކެންގެ އިތުރުން ހޮޓް ޗިކެން ސްޓޫ އެވެ.
މި ތިން ބާވަތާ ގުޅޭ ގޮތުން ޑެންކާމްގެ ވެޓެރިނަރީ އެންޑް ފުޑް އެޑްމިނިސްޓްރޭޝަނުން އިއްޔެ ނެރުނު އެލާޓެއްގައި ބުނި އެ ތިން ބާވަތުގައި ކެޕްސީސިން އެކުލެވޭ މިންވަރު ވަރަށް މަތި ކަމަށާއި އެހެންވެ ތިން ރަހައިގެ ނޫޑްލް ވެސް އިންތިހާ އަށް ކުޅިގަދަ ކަމަށެވެ. އަދި މީގެ ސަބަބުން ކާނާ ވިހަވުން ފަދަ މައްސަލަތަކެއް ދިމާވެދާނެތީ ބޭނުން ނުކުރަން އެދޭ ކަމަށް ބުންޏެވެ. ވަކިން ހާއްސަކޮށް މީގެ ނުރައްކާ ކުޑަކުދިންނަށް ބޮޑުވެދާނެ ކަމަށް ބުންޏެވެ.
"އެ ތިން ބާވަތުގެ ނޫޑްލްސް ގަނެ ރައްކާކޮށްފައި ހުރި ނަމަ އެ ތަކެތި ނައްތާލަން ނުވަތަ ގަތް ތަނަކާ ހަވާލު ކުރަން އެދެން." ފުޑް އޮތޯރިޓީން ބުންޏެވެ.
ނަމަވެސް އެ ގޮތަށް އެންގި ނަމަވެސް އެ ބާވަތުގެ ނޫޑްލްސް ކައިގެން ޑެންމާކްގެ އެއްވެސް މީހަކަށް ނުވަތަ ބަޔަކަށް ސިއްހީ އެއްވެސް މައްސަލައެއް ދިމާވި ކަމުގެ ރިޕޯޓެއް މިހާތަނަށް ލިބިފައެއް ނުވެ އެވެ. އެހެންވެ އެ ގައުމުގެ މި ނިންމުމާ ގުޅިގެން ބައެއް މީހުން މިހާރު އަންނަނީ ސޯޝަލް މީޑިއާގައި ފާޑު ވެސް ކިޔަމުންނެވެ.