އާ އަލްބަމަކަށް މަސައްކަތްތަކެއް ކުރަމުން އަންނަ ކަމަށާއި އެކަމަކު އަވަސް އަރުވާލައިގެން އަލްބަމެއް ނެރުމުގެ ވިސްނުމެއް ނެތް ކަމަށް މަޝްހޫރު ލަވަކިޔުންތެރިޔާ ރިއާނާ ބުނެފި އެވެ.
"ފެންޓީ" ގެ ނަމުގައި އަމިއްލަ ވިޔަފާރި ބްރޭންޑެެއް ވެސް ހިންގަމުން އަންނަ ފަންނާނު "ފެންޓީ ހެއާ" ލޯންޗްކުރަން ހޯމަ ދުވަހުގެ ރޭ ލޮސް އެންޖެލިސްގައި ބޭއްވި އިވެންޓްގައި އެންޓަޓައިމަންޓް ޓުނައިޓަށް ދިން އިންޓަވިއުއެއްގައި ބުނީ އަލްބަމަކަށް މަސައްކަތްކުރާތާ މިހާރު ގިނަ ދުވަސްތަކެއްވެއްޖެ ކަމަށެވެ.
ރިއާނާ ބުނީ މިއުޒިކަކީ އެއިން އޭނަ އަށް ވަކިނުވެވޭނެ އެއްޗެއް ކަމަށާއި މިހާރު އަލުން މިއުޒިކް "ޑިސްކަވަ" ކުރަނީ ކަމަށް ބުންޏެވެ.
"އެހެންވީމަ އެބަޖެހޭ ސްޓޫޑިއޯ އަށް ވަދެލައި އަލުން މަސައްކަތްތަކެއް ފަށައިގަންނަން،" ދެ ކުދިންގެ މަންމަ ބުންޏެވެ. "އެކަމަކު އަހަންނަށް އަދި ވަގުތު ބޭނުން ވާނެ."
ރިއާނާގެ ވާހަކައިގެ ރާގު ހުރި ގޮތަށް ބަލާ އިރު، އޭނަގެ އާ އަލްބަމެއް އެހާ އަވަހަކަށް ފޭނުންނާ ހަމައަށް އައުމުގެ ފުރުސަތެއް ނެތެވެ. ރިއާނާ ބުނީ އަވަސް އަރުވާލައިގެން ކޮންމެހެން އަލްބަމެއް ނެރެން ބޭނުން ވެސް ނުވާ ކަމަށެވެ.
"ކުރިން ހަދާފައި ހުރި އެއްޗެހި ވެސް އަޑު އަހާލައި، އާ ފެށުމަކުން އަނެއްކާ ވެސް ފަށައި ގަންނަން ބޭނުންވޭ." މިހާތަނަށް 8 އަލްބަމް ނެރެފައިވާ ހުނަރުވެރި އަދި ކާމިޔާބު ލަވަކިޔުންތެރިޔާ ބުންޏެވެ.
ނުވަ ގްރެމީ އެވޯޑްގެ އިތުރުން ވެސް މިއުޒިކީ ދާއިރާ އިން ދެވޭ އެތައް އެވޯޑެއް ހޯދާފައިވާ ރިއާނާގެ އެންމެ ފަހުގެ އަލްބަމަކީ 2016 ގެ "އެންޓި" އެވެ. މިހާރު އުމުރުން 36 އަހަރުގެ ފަންނާނުގެ އެންމެ ފުރަތަމަ އަލްބަމަކީ 2005 ގެ "މިއުޒިކް އޮފް ދަ ސަން" އެވެ.
އޭނަ ދެން ނެރުނު އިތުރު އަލްބަމްތަކުގެ ތެރޭގައި ހިމެނެނީ އަ ގާލް ލައިކް މީ (2006)، ގުޑް ގާލް ގޯން ބޭޑް (2007)، ރޭޓެޑް އާރް (2009)، ލައުޑް (2010)، ޓޯކް ދެޓް ޓޯކް (2011) އަދި އަންއެޕޮލޮޖެޓިކް (2012) އެވެ.