ރާއްޖޭގެ ބޮޑުކަންނެލި މަސްވެރިންގެ ހުރި ކަންބޮޑުވުންތަކުގެ އަޑު ސަރުކާރަށް އިއްވުމަށް ކަންނެލި މަސްވެރިން މިއަދު އިހުތިޖާޖެއް ފަށައިފި އެވެ.
މި އިހުތިޖާޖު ކުރިއަށް ދަނީ ބޮޑުކަންނެލި މަސްވެރިންގެ ޔޫނިއަން އިން އިންތިޒާމުކޮށްގެން ހުޅުމާލެ ކަންނެލި ޖެޓީ ސަރަހައްދުގަ އެވެ.
ބޮޑުކަންނެލީގެ ދިވެހި މަސްވެރިކަމުގެ ހާލަތު މިހާރު އޮތް ގޮތަށް އޮއްވައި އެ މަސްވެރިކަމަށް ލޭނުއަޅަން ހުއްދަ ދީފި ނަމަ، އާންމު މަސްވެރިން ބަނގުރޫޓުވާނެ ކަމަށް ބުނެ ކަންނެލި މަސްވެރިން ކަންބޮޑުވުން ފާޅުކޮށްފައިވެ އެވެ.
އެހެންވެ ކަންނެލި ޔޫނިއަން އިން ކުރިން ނެރުނު ބަޔާނެއްގައި ބުނެފައި ވަނީ ލޭނުއެޅުން ހުއްދަ ކުރުމަކީ އާންމު މަސްވެރިންގެ ބަދަލުގައި މަދު ކުންފުނިތަކަކަށް ފައިދާވާނެ ކަމެއް ކަމަށާއި ދިވެހި އަތުނަނު ކަންނެލި އޮޑިތަކުން ބާނާ ކަންނެލީގެ ޑިމާންޑު ދަށްވެ، އަގު ދަށްވާނެ ކަމަށެވެ.
ލޭނު އެޅުމަށް ހުއްދަ ދިނުމުގެ އިތުރުން ކަންނެލި ކިރުމަށް ފަހު، ފައިސާ ލިބުން ލަސްވުމަކީ ވެސް މަސްވެރިންގެ ކަންބޮޑުވުމެކެވެ.
މި ސަބުބުތަކާ ހުރެ ޖަމިއްޔާ އިން ޑިމާންޑު ކުރަނީ އިންތިހާބުގެ ތެރޭގައި ސަރުކާރުން ވައުދުވެފައިވާ ގޮތަށް ކަންނެލި ގަނެވޭނެ އެންމެ ދަށް އަގަކަށް 80ރ. އާއި 100ރ.އަށް މިފްކޯއިން ކަންނެލި ގަންނަން ފެށުމަށް ފަހު ނޫނީ ލޭނު އަޅަން ހުއްދަ ނުދިނުމަށެވެ.