ފިލްމު "ދޭވް" އިން ފުރުސަތު ލިބުނީ ބަތަލާ ކަރީނާ ކަޕޫރްގެ ސަބަބުން ކަމަށް އެކްޓަރު ފަރުދީން ޚާން ބުނެފި އެވެ.
އެ ފިލްމަށް 20 އަހަރުވުމާ ގުޅިގެން ހަނދާންތަކެއް އާކޮށް އިންސްޓަގްރާމް ޕޯސްޓެއްގައި ކުރީގެ މަޝްހޫރު ފިލްމީ ތަރި، ފީރޯޒް ޚާންގެ ދަރިފުޅު ބުނީ "ދޭވް" ގައި އޭނަ ކުޅުނު ފަރުހާން އަލީގެ ކެރެކްޓާ އިން ފުރުސަތު ލިބުނީ އެ ރޯލަށް އޭނަގެ ނަން ޑައިރެކްޓަރު ގޯވިންދު ނިހަލާނީ އަށް ކަރީނާ ރިކޮމެންޑް ކުރުމުން ކަމަށެވެ.
އެހެންވެ އެކަމަށްޓަކައި އަބަދު ވެސް ކަރީނާ އަށް ޝުކުރުވެރިވާނެ ކަމަށް ފަރުދީން ބުންޏެވެ. ދެހާސް ހަތަރެއްގައި ރިލީޒްކުރި ފިލްމުގައި ކަރީނާ އާއި އަމީތާބް ބައްޗަން ވެސް ހިމެނެ އެވެ.
ފަރުދީން ބުނި ގޮތުގައި "ދޭވް" އަކީ އޭނަ ކަރީނާއާ އެކީ ކުޅުނު ތިން ވަނަ ފިލްމު ކަމަށެވެ. ދެ ތަރިން އެކީގައި ކުޅުނު އެހެން ފިލްމުތަކަކީ 2004 ގެ "ފިދާ' ގެ އިތުރުން 2003 ގެ "ހުޝީ" އެވެ.
ވަރަށް ގިނަ ދުވަސްތަކެއް ވަންދެން އެކްޓިންއާ ދުރުގައި ހުރުމަށް ފަހު، ފަރުދީން، 50، އެނބުރި އައިސްފައި ވަނީ މިދިޔަ މަހު ނެޓްފްލިކްސް އިން ގެނެސްދިން ސަންޖޭ ލީލާ ބަންސާލީގެ ވެބް ސީރީޒް "ހީރާމަންޑީ: ދަ ޑައިމަންޑް ބާޒާރު" އިންނެވެ.