މަކަރާއި ހީލަތުގެ މައްސަލައަކާ ގުޅިގެން އަނެއްކާ ވެސް އިތުރު މީހަކު ހޯދަން އިއުލާންކޮށްފި އެވެ.
ފުލުހުން ހޯދަން އިއުލާން ކުރީ ގދ. ގައްދޫ، ސީކޯ، އަލީ އިބްރާހީމް، 22، އެވެ.
ފުލުހުން ބުނީ އޭނަ ހޯދަނީ ހއ. ކެލާ ޕޮލިސް ސްޓޭޝަނުން ތަހުގީގު ކުރަމުން އަންނަ މަކަރާއި ހީލަތުގެ މައްސަލައެއްގެ ތަހުގީގަށް ހާޒިރު ކުރުމަށް ބޭނުންވެ، އުޅޭ ވަކި ތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާތީ ކަމަށެވެ.
އެހެންވެ މި މަހުގެ 24 ވަނަ ދުވަހުގެ ހެނދުނު 11:00 އަށް މާލޭގެ ސާޖަންޓް އާދަމް ހަލީމް ކްރައިމް އިންވެސްޓިގޭޝަން ބިލްޑިން ނުވަތަ އެންމެ ކައިރީގައިވާ ޕޮލިސް ސްޓޭޝަނަކަށް އަލީ ހާޒިރުވާން އަންގާފައިވެ އެވެ.
ފުލުހުން މި ފަހުން އެންމެ ގިނައިން މީހުން ހޯދަން އިއުލާން ކުރަނީ މަކަރާއި ހީލަތުގެ މައްސަލަތަކާ ގުޅިގެންނެވެ. މިއީ މިހާރު ރާއްޖޭގައި އެންމެ ބޮޑަށް އިތުރުވަމުންދާ ކުށެވެ.
އެހެންވެ ސްކޭމްތަކާ ދެކޮޅަށް މަސައްކަތް ކުރަން ފުލުހުން ވަނީ އެންޓި-ސްކޭމް ސެންޓަރެއް ގާއިމު ކުރަން ވެސް ނިންމައިފަ އެވެ.