ހަނގުރާމައިގެ ސަބަބުން ފަލަސްތީނުގެ ގާޒާގައި ހާލުގައި ޖެހިފައިވާ ފަރާތްތަކަށް އެހީވުމުގެ ގޮތުން ސްލޮވީނިއާ އިން 2.5 މިލިއަން ޔޫރޯގެ އެހީ ފޯރުކޮށްދިނުމަށް ނިންމައިފި އެވެ.
ސްލޮވީނިއާގެ ބޮޑުވަޒީރު ރޮބަޓް ގްލޮބް ވިދާޅުވީ މި ފައިސާގެ ތެރެއިން އެއް މިލިއަން ޔޫރޯ ހަދިޔާކުރާނީ ސީދާ ފަލަސްތީނު ރައްޔިތުންނަށް ކަމަށާއި އަނެއް އެއް މިލިއަން ޔޫރޯ ހަދިޔާކުރާނީ އ.ދ ފުޑް ޕްރޮގްރާމަށް ކަމަށެވެ. އަދި 0.5 މިލިއަން ޔޫރޯ ހަނގުރާމައިގެ ސަބަބުން ނަފްސާނީ ގޮތުން އަސަރުކޮށްފައިވާ މީހުންނަށް ތަފާތު އެކި ޕްރޮގްރާމްތައް ހިންގަން ހަދިޔާކުރުމަށް ހަމަޖެހިފައިވާ ކަމަށް ގްލޮބް ވިދާޅުވި އެވެ.
މި އެހީއާއެކު ހަނގުރާމަ ފެށުނުފަހުން ސްލޮވީނިއާ އިން ގާޒާ އަށް ފޯރުކޮށްދިން އެހީގެ އަދަދު ވަނީ 4.3 މިލިއަން ޔޫރޯ ހަދިޔާކޮށްފަ އެވެ.
ސްލޮވީނިއާ އިން ފަލަސްތީނުގެ ދައުލަތް ރަސްމީކޮށް ބަލައިގަތީ މިދިޔަ މަހުގެ ތެރޭގަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 36،000 އަށް ވުރެ މައްޗަށް އަރާފަ އެވެ.