އަމިއްލަ ނަމާ ގުޅުވައިގެން ބަޔަކު ފިލްމަކަށް ނަން ދީފައިވާތީ ބޮލީވުޑްގެ މަޝްހޫރު ޑައިރެކްޓަރު/ޕްރޮޑިއުސަރު ކަރަން ޖޯހަރް އެ މައްސަލަ ބޮމްބޭ ހައި ކޯޓަށް ހުށަހަޅައިފި އެވެ.
މީޑިއާތަކުން ބުނީ އޭނަ އެ މައްސަލަ ހުށަހެޅީ މާދަމާ ސިނަމާތަކަށް ގެންނަން ނިންމާފައިވާ "ޝާދީ ކޭ ޑިރެކްޓާ ކަރަން އޯރް ޖޯހަރް" އާ ދެކޮޅަށް ކަމަށެވެ. ކަރަންގެ ނަމާ ގުޅުވައިގެން ފިލްމެއް ގެނެސްދޭތީ ހުށަހަޅާފައިވާ މައްސަލާގައި ބުނެފައި ވަނީ ނަން ބޭނުންކޮށްފައި ވަނީ ހުއްދަ ނެތި ކަމަށާއި އޭގެ ސަބަބުން ވަރަށް ބޮޑު ގެއްލުމަކާ ކުރިމަތިލާން ޖެހިފައިވާ ކަމަށެވެ.
އެހެންވެ އެ ފިލްމު ރިލިޒްކުރަން ހުއްޓުވައި ދިނުމުގެ އަމުރެއް ނެރެދޭން ބޮމްބާ ހައި ކޯޓަށް ހުށަހެޅި މައްސަލާގައި އެދިފައިވެ އެވެ.
އިއްޔެ ހުށަހެޅި މައްސަލައާ ގުޅިގެން އެކަމާ ގުޅޭ އަޑުއަހުމެއް މިއަދު ބާއްވަން ތާވަލުކޮށްފައިވާ ކަމަށް މީޑިއާތަކުން ބުންޏެވެ.
ކަރަން އަކީ ބޮލީވުޑްގެ އެންމެ ނުފޫޒު ގަދަ އެއް ޝަހުސިއްޔެތެވެ. ކާމިޔާބު އެތައް ފިލްމެއް ގެނެސްދީފައިވާ ކަރަން އަކީ މިހާރު ބޮލީވުޑްގެ ކާމިޔާބު ސްޓޫޑިއޯތަކުގެ ތެރޭގައި ހިމެނޭ ދަރުމާ ޕްރޮޑަކްޝަންގެ ވެރިޔާ އެވެ. އޭނަ ޑައިރެކްޓްކޮށް އެންމެ ފަހުން ގެނެސްދިން ފިލްމަކީ މިދިޔަ އަހަރުގެ "ރޮކީ އޯރް ރާނީ ކީ ޕްރޭމް ކަހާނީ" އެވެ.