ފަލަސްތީނަށް އެހީވާން "ފަލަސްތީނާ އެކީ ދިވެހީން" ގެ ނަމުގައި އިއްޔެ ދައުލަތުގެ މީޑިއާ، ޕީއެސްއެމުން ފެށި ޓެލެތޯނަށް ލިބުނު ފައިސާގެ އަދަދު 14.8 މިލިއަނަށް އަރައިފި އެވެ.
އިއްޔެ ހެނދުނު 8:00 އިން ރޭ ދެންވަރު 12:00 ހަމައަށް ކުރިއަށް ގެންދަން ނިންމި ޓެލެތޯން އެ ވަގުތަށް ނިންމައިލި އިރު، ލިބިފައި ވަނީ ޖުމްލަ 13.6 މިލިއަން ރުފިޔާ އެވެެ. މީގެ ތެރޭގައި ހިމެނެނީ 13،133،927ރ. އާއި 33،693.42 ޑޮލަރެވެ. ނަމަވެސް މިއަދު ހަވީރު 6:00 އާ ހަމައަށް ޓެލެފޯން ފަންޑަށް ހަދިޔާ ކުރުމުގެ ވަގުތު އިތުރު ކުރަން ނިންމުމާ ގުޅިގެން ރޭ ދަންވަރު 1:15 އާ ހަމައަށް 14.8 މިލިއަން ރުފިޔާ ލިބިފައިވެ އެވެ.
ޓެލެތޯނަށް ހާއްސަ ދެ އެކައުންޓް ނަމްބަރަށް ފައިސާ ވެސް ޓްރާންސްފާ ކުރެވޭނެ އެވެ. އެގޮތުން ރުފިޔާ އާއި ޑޮލަރުން ވެސް ފައިސާ ހަދިޔާކުރެވޭނެ އެވެ. ރުފިޔާ އިން ޖަމާކުރާނީ 7730000655865 އެކައުންޓަށެވެ. އަދި ޑޮލަރުން ނަމަ މި 7730000655866 އެކައުންޓަށެވެ.
ޓެލެތޯނަށް ވަރަށް ގިނަ ފަރާތްތަކުން ފައިސާ ހަދިޔާކޮށްފައިވެ އެވެ. އޭގެ ތެރޭގައި ސަރުކާރުގެ ކުންފުނިތަކާއި އޮފީސްތަކާއި އެކިއެކު މުއައްސަސާތަކާއި އަމިއްލަ ފަރާތްތަކުން އަމިއްލަ ފަރުދުން ވެސް ހިމެނެ އެވެ.
މި ޓެލެތޯނުން ލިބޭ ހުރިހާ ފައިސާއެއް ފަލަސްޠީނަށް ހަދިޔާ ކުރަން ނިންމާފައި ވަނީ ފޮރިން މިނިސްޓްރީ މެދުވެރިކޮށް ޔޫއެންގެ ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް "އަންރުވާ" މެދުވެރިކޮށެވެ.