ނުކުޅެދުންތެރިކަން ހުންނަ މީހުން ވަޒީފާގެ މާހައުލަށް ތަމްރީނު ކުރަން ނިންމައި، އެކަމުގެ އެއްބަސްވުމެއްގައި ސޮއިކޮށްފި އެވެ.
މި އެއްބަސްވުން ހަދާފައި ވަނީ ސޯޝަލް މިނިސްޓްރީ އާއި ކެއާ ސޮސައިޓީއާ ދެމެދު އެވެ.
މިކަމާ ގުޅޭ ގޮތުން މިނިސްޓްރީން ބުނީ ވަޒީފާގެ މާހައުލަށް ނުކުޅެދޭ މީހުން ހާނުވަން ތަމްރީނު ކުރަން ކުރިއަށް ގެންދަން ނިންމާފައިވާ ޕްރޮގްރާމް ހާއްސަ ކުރާނީ އެ މިނިސްޓްރީގެ ދަފުތަރުގައި ވަޒީފާގެ ފުރުޞަތު ހޯދުމަށް އެދިފައިވާ މީހުންގެ ތެރެއިން ވަޒީފާއަށް ހޮވިފައިވާ މީހުންނަށް ކަމަށެވެ.
ދެ މަސް ދުވަހަށް ކުރިއަށް ގެންދާ ޕްރޮގްރާމްގައި ނުކުޅެދުންތެރިކަން ހުންނަ މީހުން ވަޒީފާގެ މާޙައުލަށް އަހުލުވެރިކޮށް، މަސައްކަތަށް ބޭނުންވާ އެކި ހުނަރުތައް ދަސްކޮށް ދޭނެ އެވެ. އެގޮތުން މަސައްކަތުގެ މާޙައުލުގައި ގެންގުޅެން ޖެހޭ މިންގަނޑުތަކާ އަޚްލާގުގެ ބައިތައް ފަދަ ކަންކަން ކިޔައި ދޭނެ އެވެ. އަދި މަސައްކަތުގެ މާޙައުލުގައި ދިމާވާ ގޮންޖެހުންތަކުން އަރައިގަތުމުގައި ޢަމަލުކުރާނެ ގޮތްތަކުގެ މަޢުލޫމާތު ވެސް ބައިވެރިންނަށް ފޯރުކޮށް ދޭނެ އެވެ.
ފަހަކަށް އައިސް ރާއްޖޭގެ އެކިއެކި ކުންފުނިތަކާއި އެ ނޫން ވެސް އޮފީސްތަކުން ނުކުޅެދުންތެރިކަން ހުންނަ މީހުންނަށް ވަޒީފާ ދިނުން ވަރަށް ބޮޑަށް އިތުރުކޮށްފައިވެ އެވެ. މީގެ ބޭނުމަކީ އެފަދަ މީހުން ބާރުވެރިކޮށް، އެ މީހުންނަކީ މުޖުތަމައަށް އަދ ގައުމަށް ބޭނުންތެރި ބަޔަކަށް ހެދުމަށް ބާރު އެޅުމެވެ.
ސޯޝަލް މިނިސްޓްރީން ބުނީ ކުރިއަށް އޮތް ތަނުގައި ވެސް އެ މިނިސްޓްރީން އެހެނިހެން މުއައްސަސާތަކާ ގުޅިގެން ނުކުޅެދުންތެރިކަން ހުރި ފަރާތްތަކަކަށް ވަޒީފާގެ ފުރުސަތުތައް ފަހިކޮށްދީ، އެ ފަރާތްތަކުގެ ދިރިއުޅުމުގެ ފެންވަރު ރަނގަޅުކޮށް، އަބުރުވެރި، އުފާވެރި ދިރިއުޅުމެއް އުޅުމުގެ ފުރުޞަތު ފަހިކޮށްދިނުމަށް ގިނަ މަސައްކަތްތަކެއް ކުރާނެ ކަމަށެވެ.