ބޮލީވުޑްގެ ތަރިން ކަމަށްވާ އަޖޭ ދޭވްގަނާއި ތައްބޫގެ ލޯބީގެ ފިލްމު "އޯރޯ މޭ ކަހާ ދަމް ތާ" ގެ ޓްރެއިލާ މިއަދު ދައްކާލައިފި އެވެ.
އަންނަ މަހު ސިނަމާތަކަށް ގެންނަން ހަމަޖެހިފައިވާ މި ފިލްމަކީ މި ދެ ތަރިން އެކީގައި ކުޅުނު 13 ވަނަ ފިލްމެވެ. މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "އޯރޯ މޭ ކަހާ ދަމް ތާ" ގެ ކާސްޓްގައި ޖިމީ ޝެރްގިލް އާއި ޒުވާން ތަރިން ކަމަށްވާ ޝަންތަނޫ މަހޭޝްވަރީގެ އިތުރުން ސައީ މަންޖްރޭކަރް ވެސް ހިމެނެ އެވެ.
ޓްރެއިލާ އިން ފެންނަ ގޮތުގައި ޝަންތަނޫ އާއި ސައީ ފިލްމުގައި ފެނިގެން ދާނީ އަޖޭ އާއި ތައްބޫގެ އެންމެ ޒުވާން ދުވަސްވަރުގެ ރޯލުތަކުންނެވެ.
"އޯރޯ މޭ ކަހާ ދަމް ތާ" ގެ ޑައިރެކްޓަރަކީ މީގެ ކުރިން ވަރަށް ސީރިއަސް ފިލްމުތަމެއް ގެނެސްދީފައިވާ ނީރަޖް ޕާންޑޭ އެވެ. އޭނަގެ އެންމެ ފަހުގެ ފިލްމަކީ 2018 ގެ "އައްޔާރީ" އެވެ. ނީރަޖް ޑައިރެކްޓްކުރި ފިލްމުތަކުގެ ތެރޭގައި "އަ ވެނިޒްޑޭ"، "ސްޕެޝަލް 26"، "ބޭބީ" އަދި "އެމްއެސް ދޯނީ: ދި އަންޓޯލްޑް ސްޓޯރީ" ހިމެނެ އެވެ.
"އޯރޯ މޭ ކަހާ ދަމް ތާ" ބެލުންތެރިންނަށް ދޫކޮށްލަން ހަނމަޖެހިފައި ވަނީ އަންނަ މަހުގެ 5 ގަ އެވެ. އެ ތާރީހަކީ ކަރަން ޖޯހަރްގެ ދަރުމާ ޕްރޮޑަކްޝަންގެ އެކްޝަން ތުރިލާ "ކިލް" ވެސް ރިލީޒްކުރާ ދުވަހެވެ.
"އޯރޯ މޭ ކަހާ ދަމް ތާ" އަކީ މި އަހަރު ރިލީޒްވާ އަޖޭގެ ތިން ވަނަ ފިލްމެވެ. ކުރިން ރިލީޒްވި އޭނަގެ ފިލްމުތަކީ އެޕްރީލްގައި ގެނެސްދިން "މައިދާން" އާއި މާޗްގައި ރިލީޒްކުރި "ޝައިތާން" އެވެ. ތައްބޫގެ އެންމެ ފަހުގެ ފިލްމަކީ މާޗްގައި ބެލުންތެރިންނަށް ގެނެސްދިން "ކްރޫ" އެވެ.