ރާއްޖޭގައި މަސައްކަތްކުރާ ބިދޭސީން ގަވާއިދަށް ފެއްތުމަށްޓަކައި ފެށި "ކުރަނގި" އޮޕަރޭޝަން މިއަދު ކ. މާފުށީގައި ފަށައިފިއެވެ.
ތިން މަރުހަލާއަށް ބަހާލައިގެން މުޅި ރާއްޖޭގައި ތިން އަހަރަށް ކުރިއަށް ގެންދާ އޮޕަރޭޝަން އެންމެ ފުރަތަމަ ކުރިއަށް ގެންދިޔައީ ކ. ހިންމަފުށީގަ އެެވެ. އެ ރަށުގައި އޮޕަރޭޝަން ލޯންޗްކުރީ މިދިޔަ މަހުގެ 3 ގަ އެވެ.
މާފުއްޓަކީ "ކުރަނގި" އޮޕަރޭޝަން ކުރިއަށް ގެންދާ ދެވަނަ ރަށެވެ.
ހޯމްލޭންޑް މިނިސްޓްރީ އިސްކޮށް އޮވެގެން ކުރިއަށް ގެންދާ މި ޕްރޮގްރާމްގެ ދަށުން މިހާތަނަށް 705 ބިދޭސީ މަސައްކަތްތެރިންގެ ބަޔޮމެޓްރިކް ޑާޓާ ނަގައި އެ މައުލޫމާތު ބަލަހައްޓާ ސިސްޓަމަށް އަޕްލޯޑްކޮށްފައިވެ އެވެ.
މި އޮޕަރޭޝަންގެ ފުރަތަމަ އަހަރު ކުރަން ނިންމާފައިވާ ކަންކަމަކީ ރާއްޖޭގެ އެކި ކަންކޮޅުތަކުގައި ގަވާއިދާ ހިލާފަށް އުޅޭ ބިދޭސީން ހޯމް މިނިސްޓްރީގެ ސިސްޓަމްގެ ތެރެއަށް ގެނައުމެވެ. އަދި އެ މަސައްކަތް ނިމޭ އިރު ރާއްޖޭގައި ތިބީ ކޮން ގައުމުތަކެއްގެ ބިދޭސީންނެއްކަމާއި، މަސައްކަތް ކުރާތަން ފަދަ ހުރިހާ މައުލޫމާތެއް ސިސްޓަމަށް ނަގާނެ އެވެ.