މަންކީޕޮކްސް ޖެހިގެން ދެކުނު އެފްރިކާ އިން ދެ މީހަކު މަރުވެއްޖެ އެވެ.
އެ ގައުމުގެ ހެލްތު މިނިސްޓްރީން ބުނީ ދެވަނަ މީހާ މަރުވީ ފުރަތަމަ މީހާ މަރުވިތާ 24 ގަޑިއިރު ވެސް ނުވަނީސް ކަމަށެވެ. މަރުވި ދެ މީހުންނަކީ 37 އަހަރާއި 38 އަހަރުގެ ފިރިހެނުންނެވެ. އެމްޕޮކްސްގެ ކޭހެއް ދެކުނު އެފްރިކާ އިން ފުރަތަމަ ފެނުނީ މީގެ ފަސް ހަފުތާ ކުރިންނެވެ.
އެ ގައުމުގެ ހެލްތު މިނިސްޓަރު ޖޯ ފާލާ ވިދާޅުވީ ބަލީގައި މަރުވި ދެ މީހުންނަށް ވެސް ބަލި ޖެހުނީ ގައުމުން ބޭރަށް ދަތުރުކޮށްގެން ނޫން ކަމަށާއި ބަލި ޖެހުނީ ސީދާ ގައުމުން ކަމަށެވެ. އަދި މިހާރު ދެކުނު އެފްރިކާގައި އެމްޕޮކްސް ޖެހިފައިވާ މީހުންގެ އަދަދު ހަޔަކަށް ވަނީ އަރައިފަ އެވެ. އެހެންވެ ބަލި ފެތުރިޔަ ނުދިމަށް މިހާރު ގިނަ ފިޔަވަޅުތަކެއް އަޅަމުން އަންނަ ކަމަށް ވެސް މިނިސްޓަރު ވިދާޅުވި އެވެ.
އެމްޕޮކްސް 2022 ގައި ވަރަށް ބޮޑަށް ފެތުރި 100 އަށް ވުރެ ގިނަ ގައުމުން ބަލި ފެނިފައިވެ އެވެ.
ދިރާސާތަކުން ދައްކާ ގޮތުގައި އެމްޕޮކްސް އެންމެ އާންމީ އެއްޖިންސުން ގުޅުން ހިންގާ ފިރިހެނުންގެ މެދުގަ އެވެ. މި ބަލި އެންމެ ފުރަތަމަ ފެނުނީ ކޮންގޯ އިން 1970 ގަ އެވެ.