ކުރިން އޮގަސްޓް މަހު ރިލީޒްކުރަން ނިންމި އަޖޭ ދޭވްގަންގެ "ސިންގަމް" ފްރެންޗައިޒްގެ ތިން ވަނަ ބައި މި އަހަރުގެ ނޮވެމްބަރަށް ފަސްކޮށްފި އެވެ.
ރޯހިތު ޝެޓީ ޑައިރެކްޓްކުރާ "ސިންގަމް އެގެއިން" މިހާރު ބެލުންތެރިންނަށް ގެނެސްދޭން ނިންމާފައި ވަނީ ނޮވެމްބަރުގައި ފާހަގަކުރާ ދިވާލީގެ ތެރޭގައިކަން މިއަދު ވަނީ ރަސްމީކޮށް އިއުލާންކޮށްފަ އެވެ. ނަމަވެސް ފިލްމު ފަސްކުރި ސަބަބެއް ހާމައެއްނުކުރެ އެވެ.
ކުރިން އޮތް ގޮތުން ބޮޑު ކާސްޓެއް ހިމެނޭ "ސިންގަމް އެގެއިން" ސިނަމާތަކަށް ދޫކޮށްލަން އޮތީ އޮގަސްޓް 15 ގަ އެވެ.
އެ ތާރީހަކީ މަޝްހޫރު ތެލެގޫ އެކްޓަރު އައްލޫ އަރުޖުންގެ "ޕުޝްޕާ 2: ދަ ރޫލް" އާއި އަކްޝޭ ކުމާރުގެ "ކޭލް ކޭލް މޭ" އާއި ޝްރަދާ ކަޕޫރްގެ "އިސްތިރީ 2" ވެސް ގެނެސްދޭން އޮތް ތާރީހެވެ.
ބައެއް ރިޕޯޓްތައް ބުނާ ގޮތުން "ސިންގަމް އެގެއިން" ނޮވެމްބަރަށް ފަސްކުރި އިރު، "ޕުޝްޕާ 2" އޮގަސްޓްގެ ބަދަލުގައި އެހެން ތާރީހަކަށް ހަމަޖެއްސުމުގެ މަސައްކަތް މިހާރު އަންނަނީ ކުރަމުންނެވެ.
މި އަހަރު ރިލީޒްކުރި "މައިދާން" އާއި "ޝައިތާން" އަށް ފަހު އަޖޭ ދެން އެންމެ އަވަހަށް ފެންނާނީ އަންނަ މަހުގެ 5 ގައި ރިލީޒްކުރާ "އޯރޯ މޭ ކަހާ ދަމް ތާ" އިންނެވެ.
އޭނަގެ "ސިންގަމް އެގެއިން" ނޮވެމްބަރުގައި ގެނެސްދޭ އިރު، ދިވާލީގައި ރިލީޒްކުރަން އޮތް އެންމެ ފާހަގަކޮށްލެވޭ ފިލްމަކީ ކާތިކް އާރިއަންގެ "ބޫލް ބުލައްޔާ 3" އެވެ.
އަޖޭއާ އެކީ "ސިންގަމް އެގެއިން" ގެ ކާސްޓްގައި ދީޕިކާ ޕަދްކޯން، ކަރީނާ ކަޕޫރް، އަރުޖުން ކަޕޫރް، ޓައިގާ ޝްރޮފް، ރަންވީރު ސިންގް އަދި އަކްޝޭ ފެންނާނެ އެވެ.