މޯލްޑިވްސް ނެޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމްއެސްޑީއޭ) އާއި މޯލްޑިވްސް ޕޮލިޓެކްނިކް ގުޅިގެން ނެޝަނަލް އެޕްރެންޓިސްޝިޕް ޕްރޮގްރާމް ފަށަން ތައްޔާރުވެއްޖެ އެވެ.
އެމްއެސްޑީއޭ އިން ބުނީ މި ޕްރޮގްރާމް ފަށާއިރު ފުރަތަމަ ފެށުމަށް ހަމަޖެހިފައި ވަނީ ނެޝަނަލް ސެޓްފިކެޓް ލެވެލް ތިނެއްގެ ތަމްރީނުތަކުން ކަމަށެވެ. އެ އޮތޯރިޓީން ބުނީ ނެޝަނަލް އެޕްރެންޓިސް ޕްރޮގްރާމުގެ ދަށުން ހިންގާ ތަމްރީނުތަކަކީ ރާއްޖޭގައި މަސައްކަތްކުރާ ހުރިހާ ދާއިރާއަކަށް ބޭނުންވާ ފަންނީ ހުނަރުވެރިން ތަމްރީނުކުރުމަށް ހިންގާ ތަމްރީނުތަކެއް ކަމަށެވެ.
މިގޮތުން ޕްރޮގްރާމަކީ މަސައްކަތު މާހައުލުގައި ތިބެގެން މަސައްކަތް ދަސްކުރާނެ ޕްރޮގަރާމަކަށްވާތީ މި ޕްރޮގްރާމުގެ ދަށުން ހިންގާ ތަމްރީނުތަކުގައި ބައިވެރިވާނެ މީހުން ނެގުމަށް އިޢުލާނުކުރުމަށް ފަހު، އެޕްލިކޭޝަން ފޯމުތައް ހުށަހަޅާ ފަރާތްތަކުގެ ތެރެއިން މަސައްކަތު މާހައުލުގައި ތަމްރީނު ފުރިހަމަ ކުރުމަށް ބޭނުންވާ މުއްދަތުގައި ތިބެވޭނެ މީހުންނަށް އިސްކަންދޭނެ ކަމަށް ބުންޏެވެ.
އަދި ހޮވޭ ފޮނުވޭނީ އެ ތަމްރީނަކާ ގުޅޭ މަސައްކަތްކުރާ ތަނަކަށް ކަމަށާއި މަސައްކަތް ދަސްކޮށް ދިނުމުގައި ހަރަކާތްތެރި ވާނީ އެ ތަންތަނުގައި މަސައްކަތްކުރާ ތަޖުރިބާކާރުން ނުވަތަ ސުޕަވައިޒަރު ފެންވަރުގެ އިސް މުވައްޒަފުންނެވެ. ކަމަށެވެ.
މީގެތުރުން ތަމްރީނުތައް ހިންގާ މުއްދަތުގައި ތަމްރީނުހޯދާ ފަރާތްތަކަށް ލިބެމުން އަންނަ މައުލޫމާތާއި ދަސްވަމުންދާ މަސައްކަތްތަކަކީ ނެޝަނަލް ކޮމްޕީޓެންސީ ސްޓޭންޑާޑްގައި ހިމެނޭ މަސައްކަތްތޯ ބަލައި، ކަށަވަރުކުރުމާއި ތަމްރީނުވަމުން ވަނީ ކަނޑައެޅިފައިވާ މިނަށްތޯ ބަލާނެ ކަމަށް އެ އޮތޯރިޓީން ބުންޏެވެ.