ރައީސް ޑރ. މުހައްމަދު މުއިއްޒުގެ ވެރިކަމުގެ ފުރަތަމަ ފަސް އަހަރު ދުވަހުގެ ތެރޭގައި ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅަން ގަސްދުކުރާ ބިލުތައް އެކުލެވޭ "ސަރުކާރުގެ ލެޖިސްލެޓިވް އެޖެންޑާ 2023-2028" ކަނޑައެޅިފައިވާ ތާވަލާ އެއްގޮތަށް ކުރިއަށް ގެންދެވުމަށް ވަޒީރުންގެ މަޖިލީހުގެ ލަފައާ އެކީ ނިންމައިފި އެވެ.
އެގޮތަށް ނިންމީ އިއްޔެ ބޭއްވި ވަޒީރުންގެ މަޖިލީހުގެ ބައްދަލުވުމުގައި އެޓާނީ ޖެނެރަލްގެ އޮފީހުން ހުށަހެޅުއްވި ކަރުދާހުގެ މައްޗަށް ވަޒީރުންގެ މެދުގައި މަޝްވަރާ ކުރެއްވުމަށް ފަހުގަ އެވެ.
ސަރުކާރުގެ ލެޖިސްލެޓިވް އެޖެންޑާ އަކީ އެއިރެއްގައި ވެރިކަމަށް އަންނަ ސަރުކާރަކުން އެ ސަރުކާރުގެ ފަސް އަހަރު ދުވަހުގެ ދައުރުގައި ފުރިހަމަ ކުރާނެ ކަމަށް ބަޔާންކޮށްފައިވާ ވައުދުތަކާއި ކުރިއަށް ގެންދަން ނިންމާފައިވާ އިސްލާހީ މަސައްކަތްތަކާ ގުޅިގެން އަދި ދައުލަތް ހިންގުން ހަރުދަނާ ކުރުމަށާއި ގައުމާއި ރައްޔިތުންގެ ރައްކާތެރިކަމާއި ކުރިއެރުމަށްޓަކައި އެންމެ އިސްކަމެއްދީގެން ތައާރުފު ކުރަން ނިންމާ ގާނޫނުތަކާ ގުޅޭ ބިލުތައް އަންގައިދޭ އެޖެންޑާ އެކެވެ.
ލެޖިސްލެޓިވް އެޖެންޑާގައި 15 މައުލޫޝޫއަކާ ގުޅޭ ޖުމްލަ 213 ބިލެއް އެކުލެވިގެންވެ އެވެ. އޭގެ ތެރޭގައި މުޅިން އަލަށް އެކުލަވާލަން ޖެހޭ 78 ގާނޫނަކާ ގުޅޭ ބިލާއި މިހާރު އަމަލުކުރެވޭ ގާނޫނުތަކުގެ ތެރެއިން އިސްލާހު ގެންނަންޖެހޭ ނުވަތަ އުވާލަން ޖެހޭ ގާނޫނުތަކަށް އިސްލާހު ގެނައުމަށްޓަކައި ހުށަހަޅަން ގަސްދުކުރާ 135 ބިލެއް ހިމެނެ އެވެ.
ލެޖިސްލޭޓިވް އެޖެންޑާގައި މައިގަނޑު ގޮތެއްގައި ހަ ދާއިރާއެއްގެ ބިލުތަކެވެ.
* ސަރުކާރުގެ މެނިފެސްޓީގައި ހިމެނޭ ވައުދުތަކާ ގުޅިގެން އެކުލަވައިލަންޖެހޭ ބިލުތައް
* ގާނޫނުއަސާސީގެ ދަށުން އެކުލަވައިލަންޖެހޭ ބިލުތަކާއި ގާނޫނުއަސާސީއާ ތައާރުޒުވާތީ އިސްލާހު ކުރަން ނުވަތަ ގާނޫނުތަކާ ގުޅޭ ބިލުތައް
* ދައުލަތުގެ އިދާރާތަކުގެ މަސައްކަތްތައް ހިންގުމުގެ ގާނޫނެއް ހެދިފައި ނެތިފައި ކޮންމެހެން ގާނޫނަކުން ބާރު ލިބިދޭންޖެހޭ ކަންކަމާ ގުޅޭ ބިލުތައް
* ގާނޫނު ތަންފީޒުކުރުމުގައި ދިމާވާ ދަތިތައް ހއްލުކުރުމަށްޓަކައި އިސްލާހު ގެންނަންޖެހޭ ގާނޫނުތަކާ ގުޅޭ ބިލުތައް
* ޒަމާނާ ނުގުޅޭތީ އިސްލާހު ގެންނަންޖެހޭ ނުވަތަ އުވައިލަންޖެހޭ ގާނޫނުތަކާ ގުޅޭ ބިލުތައް
* ރާއްޖެ އިން ބައިވެރިވެފައިވާ މުއާހަދާތަކަށް ރާއްޖެއިން އަމަލުކުރުމަށްޓަަކައި އެކުލަވައިލަންޖެހޭ ބިލުތައް
ލެޖިސްލޭޓިވް އެޖެންޑާގައި ހިމެނޭ ބިލުތަކުގެ ތެރޭގައި ދުސްތޫރީ އަދި ގާނޫނީ ކަންކަމާ ގުޅޭ 15 ބިލަކާއި ދައުލަތް ހިންގުމާ ގުޅުންހުރި ނުވަ ބިލަކާއި، ހައްގުތަކާއި މިނިވަންކަމާ ގުޅުންހުރި އަށް ބިލާއި، އިސްލާމްދީނާއި ގައުމިއްޔަތާ ގުޅުންހުރި އަށް ބިލާއި، ގައުމީ ސަލާމަތާއި ހާރިޖީ ގުޅުންތަކާ ބެހޭ 15 ބިލާއި، ސިއްހަތާއި ދުޅަހެޔޮކަމާ ގުޅުންހުރި 11 ބިލެއް ހިމެނެ އެވެ.
ފަސް އަހަރުގެ ލެޖިސްލެޓިވް އެޖެންޑާގައި ރައީސް ވަނީ ކޮރަޕްޝަނާއި ކުށްކުރުން ހުއްޓުވުމާ ގުޅޭ 22 ބިލަކާއި އާއިލާއާ މުޖުތަމައާ ގުޅުންހުރި 20 ބިލަކާއި، ފައިސާ އާއި މާލީ ކަަންކަމާ ގުޅުންހުރި 22 ބިލެއް ވެސް ހިމަނައިފަ އެވެ. އަދި ޒަމާނާ ނުގުޅޭތީ އުވައިލަން ނުވަތަ އިސްލާހުކރުަންޖެހޭ ގާނޫނުތަކާ ގުޅޭ 26 ބިލެއް ވެސް އެޖެންޑާގައި ހިމެނެ އެވެ. މީގެ އިތުރުން ވިޔަފާރި އާއި އިގުތިސާދުގެ ދާއިރާގެ 22 ބިލެއް ވެސް ހުށަހަޅަން ހިމަނާފައިވެ އެވެ.
ސަރުކާރު ހިންގާ ޕީއެންސީ އަށް ސުޕަ މެޖޯރިޓީ އޮތް 20 ވަނަ ރއްޔިތުންގެ މަޖިލީހުގެ ފުރަތަމަ ދައުރަށް ސަރުކާރުގެ ފަރާތުން ވަނީ 37 ބިލެއް ހުށަހަޅައިފަ އެވެ.