ކުރިން މި އަހަރުގެ އެޕްރީލް 5 ގައި ރިލީޒްކުރަން ނިންމުމަށް ފަހު، އޮކްޓޯބަރަށް ފަސްކުރި މަޝްހޫރު ތެލެގޫ އެކްޓަރު އެންޓީއާރް ޖޫނިއާގެ "ދެވާރާ: ޕާޓް 1" ސެޕްޓެމްބަރަށް އަވަސްކޮށްފި އެވެ.
އިންޑިއާގެ ފިލްމުތަކެއްގެ ތާރީހުތަކަށް އިއްޔެ ގެނައި ބަދަލާ ގުޅިގެން މިހާރު އެ ފިލްމު ބެލުންތެރިންނަށް ގެނެސްދޭން ނިންމީ ސެޕްޓެމްބަރު 27 ގަ އެވެ. އެ ތާރީހަކީ ކުރިން އާލިއާ ބަޓްގެ "ޖިގްރާ" ސިނަމާތަކަށް ގެންނަން އިތް ތާރީހެވެ. ނަމަވެސް "ދެވާރާ" ރިލީޒްކުރަން ކުރިން އޮތް ތާރީހު ކަމަށްވާ އޮކްޓޯބަރު 11 އަށް މިހާރު އޮތީ އާލިއާގެ ފިލްމު ތާވަލުކޮށްފަ އެވެ.
ފާހަގަކޮށްލެވޭ ކަމަކީ މި ދެ ފިލްމަކީ ވެސް ކަރަން ޖޯހަރްގެ ދަރުމާ ޕްރޮޑަކްޝަނުން ހިއްސާވާ ދެ ފިލްމުކަމެވެ. ތެލެގޫ ބަހުން ހަދާފައިވާ "ދެވާރާ" ގެ ހިންދީ އޯޑިއަންސަށް ގެނެސްދިނުމުގެ ޒިންމާއާ ދަރުމާ އިން ހަވާލުވެފައިވާ އިރު، "ޖިގްރާ" އަކީ އެ ސްޓޫޑިއޯ އާއި އާލިއާގެ އިޓާނަލް ސަންޝައިން ގުޅިގެން ގެނެސްދޭ ފިލްމެކެވެ.
"ދެވާރާ" އަކީ 2022 ގައި ރިލީޒްކުރި އަދި އާލިއާ ބަތަލާގެ ރޯލު ކުޅުނު ކާމިޔާބު ފިލްމު "އާރްއާރްއާރް" އަށް ފަހު، ބެލުންތެރިންނާ ހަމައަށް އަންނަ އެންޓީއާރް ޖޫނިއާގެ ފުރަތަމަ ފިލްމެވެ. އެހެންވެ ވަރަށް ގިނަ ބަޔަލު އަންނަނީ މި ފިލްމަށް ވަރަށް ބޮޑަށް އިންތިޒާރު ކުރަމުންނެވެ.
ކޮރަޓަލާ ސިވާ ޑައިރެކްޓްކޮށް ގެނެސްދޭ އެކްޝަން ފިލްމު "ދެވާރާ" ގެ ބަތަލާ އަކީ ޖާންވީ ކަޕޫރެވެ. އަދި މީގެ ކާސްޓްގައި ސައިފް އަލީ ޚާން ވެސް ހިމެނެ އެވެ.