ބޮލީވުޑްގެ ތަރި އާމިރު ޚާންގެ ދަރިފުޅު ޖުނައިދު ޚާންގެ ފުރަތަމަ ފިލްމު "މަހާރާޖް" މިއަދު ނެޓްފްލިކްސް އިން ޕްރީމިއާކުރަން އޮތް ނަމަވެސް ފިލްމު ގެނެސްދިނުން ކޯޓުން ހުއްޓުވައިފި އެވެ.
މީޑިއާތަކުން ބުނީ މި މަހުގެ 18 ކުރިން އެ ފިލްމު ޕްރީމިއާ ނުކުރުމުގެ އަމުރެއް ތިން ކޯޓަކުން ނެރެފައިވާ ކަމަށެވެ. އެއީ މުމްބާއީ އާއި އަހުމަދުއާބާދުގެ އިތުރުން ގުޖުރާތުގެ ކޯޓަކުންނެވެ. ކޯޓްތަކުން އެފަދަ އަމުރެއް ނެރުނީ "މަހާރާޖް" އާ ގުޅޭ ގޮތުން ހިންދޫގެ ޖަމާއަތެއް ކަމަށްވާ ވިޝްނޫ ހިންދޫ ޕަރީޝާދު (ވީއެޗްޕީ) އިން ހުށަހެޅި މައްސަލައަކާ ގުޅިގެންނެވެ.
އެ ޖަމާއަތުން ބުނެފައި ވަނީ ޔާޝްރާޖް ފިލްމްސް (ވައިއާރްއެފް) ގެ މި ފިލްމުގައި ހިންދޫންނަށް ކުޑައިމީސްވާ ގޮތަށް މަންޒަރުތަކެއް ހިމެނޭކަމުގެ މައުލޫމާތު ލިބިފައިވާ ކަމަށެވެ. އެހެންވެ ނެޓްފްލިކްސް އިން ފިލްމު ޕްރީމިއާކުރަން ވާނީ އޭގެ ހާއްސަ ސްކްރީންތަކެއް ބޭއްވުމަށް ފަހު ކަމަށް ބުނެ އިންޒާރު ދީފައިވެ އެވެ.
ނަމަވެސް މިކަމާ ގުޅިގެން ވައިއާރްއެފުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ. މި މަހުގެ 14 ގައި "މަހާރާޖް" ނެޓްފްލިކްސް އިން ޕްރީމިއާކުރަން ނިންމިކަން މިދިޔަ މަހުގެ 29 ގައި އިއުލާންކުރި ފަހަކުން ފިލްމާ ގުޅޭ އެއްވެސް ހަރަކާތެއް އެ ސްޓޫޑިއޯ އިން ހިންގައިފައެއް ނުވެ އެވެ.
އެގޮތުން "މަހާރާޖް" ގެ ޓްރެއިލާ ވެސް އާންމުކޮށްފައެއް ނުވެ އެވެ.
ސިދާތު ޕީ ޑައިރެކްޓްކުރި މި ފިލްމަކީ 1862 ގައި އިންޑިއާގައި ފެންމަތިވި ޖިންސީ ބޮޑު މައްސަލަގަނޑެއްގެ ވާހަކަ ގެނެސްދިން ނޫސްވެރިންތަކަކާ ދެކޮޅަށް ކުރި ދައުވާތަކެއްގެ މައްޗަށް ބިނާކޮށް ހަދާފައިވާ ފިލްމެކެވެ.