މިދިޔަ މަހުގެ ތެރޭގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގަތް ސްމޯލް އައިލެންޑް ޑިވެލޮޕްމަންޓް ސްޓޭޓްސް (ސިޑްސް) ކޮންފަރެންސްގެ ދަތުރަށް 3.8 މިލިއަން ރުފިޔާ ޚަރަދުވި ކަމަށް ރައީސް އޮފީހުން ބުނެފި އެވެ.
ރައީސާއި މިނިސްޓަރުންގެ ޓީމެއް އެންޓީގާ އެންޑް ބާބިޔުޑާ އަށް ވަޑައިގެންނެވީ މެއި 24-31 އަށެވެ. އެގޮތުން ދަތުރުގައި ޖުމްލަ 16 ބޭފުޅަކު ބައިވެރިވެވަޑައިގެންނެވި އެވެ.
ދަތުރަށް ހިނގި ހަރަދުގެ ތަފުސީލާ ބެހޭ ގޮތުން ރައީސް އޮފީހުން ބުނީ އެންމެ ބޮޑު ހަރަދެއް ހިނގީ ދަތުރުގައި ބައިވެރިވެވަޑައިގަތް ބޭފުޅުންގެ ދެކޮޅު ޓިކެޓް ހަރަދަށް ކަމަށެވެ. އެއީ 2.6 މިލިއަން ރުފިޔާއެވެ. ރައީސް އޮފީހުން ބުނީ މި ދަތުރުފުޅު ކުރެއްވީ ރާއްޖެއާ ވަރަށް ދުރުގައި އޮތް ގައުމަކަށްވާތީ ރާއްޖެ އިން ފުރާވަޑައިގަތުމާއި، އެނބުރި ވަޑައިގަތުމުގައި ވެސް ދަތުރުމަތީ ކޮންމެ ފަހަރަކު 36 ގަޑިިއިރަށް ވުރެ ގިނަ އިރު ހޭދަކުރެއްވި ކަމަށެވެ.
ސިޑްސް ކޮންފަރެންސްގެ ދައުވަތު ރައީސް ޑރ. މުއިއްޒަށް އެރުވީ ކޮޕް 28 ސަމިޓްގެ ހަވާސާގައި އެންޓިގުއާ އެންޑް ބާބިއުޑާގެ ބޮޑުވަޒީރު ގެސްޓޮން ބްރައުންއާ އެކު ބޭއްވެވި ބައްދަލުކުރެއްވުމުގައެވެ.