ދަރިއަކު ވެސް ލިބިފައި ވަނިކޮށް ފުރަތަމަ ކައިވެނި ރޫޅިފައިވާ އިންޑިއާގެ ބަތަލާ ކޮންކޮނާ ސެން ޝަރުމާ އާ ބައިވެރިޔަކު ހޯދައިފި އެވެ.
އޭނަ އާއި އެކްޓަރު އަމޯލް ޕްރަޝާރު ރައްޓެހިވެގެން އުޅޭކަމުގެ އަޑުތަކެއް އަރާފައި ވަނިކޮށް، ބޮލީވުޑް ހަންގާމާ އަށް ދިން އިންޓަވިއުއެއް އަމޯލް، 37، ވަނީ ކޮންކޮނާ، 44، އާ ރައްޓެހިވެގެން އުޅޭކަން ކަށަވަރުކޮށް ދީފަ އެވެ. އޭނަ ބުނީ ދެ މީހުން ވެސް ތިބީ ވަރަށް އުފުލުން ކަމަށާއި ގުޅުމާ މެދު ވަރަށް ސީރިއަސް ކަމަށެވެ.
އަމޯލް ބުނިގޮތުގައި އޭނަ އާއި ކޮންކޮނާއާ ދެމެދު އޮތް ގުޅުން ލޯތްބަށް ބަދަލުވީ ކޮވިޑްގެ ވަބާގެ ތެރޭގައި ކުރިމަތިލާން ޖެހުނު ލޮކްޑައުންގެ ތެރޭގަ އެވެ. އަދި އޭގެ ފަހުން ދެ މީހުންގެ ގުޅުން ވަރަށް ބަދަހިވެފައިވާ ކަމަށް ބުންޏެވެ.
"އެހެންވެ އަހަރެމެން ނޫޅޭ މީހާރަކު އެކަން ސިއްރުކުރާކަށް ވެސް." އަމޯލް ބުންޏެވެ.
ކޮންކޮނާއާ އެކީ އަމޯލް ފިލްމެއްގެ މަސައްކަތް ވެސް ކޮށްފައިވެ އެވެ. އެއީ 2020 ގެ "ޑޮލީ ކިޓީ އޯރް ވޯ ޗަމަތުކޭ ސިތާރޭ" ގަ އެވެ.
ބަތަލާއެއްގެ އިތުރުން މިހާރު ޑައިރެކްޓަރެއްގެ ގޮތުގައި ވެސް މަސައްކަތް ކުރަމުން އަންނަ ކޮންކޮނާގެ ކުރީގެ ފިރިމީހާ އަދި ދަރިފުޅުގެ ބައްޕަ އަކީ އެކްޓަރު ރަންވީރު ޝޯރޭ އެވެ. އެ ދެ މީހުންގެ 2010 ގެ ކައިވެނި ރޫޅައިލީ 2020 ގަ އެވެ. ދެ ނެޝަނަލް އެވޯޑް ވެސް ހޯދާފައިިވާ ކޮންކޮނާ އަކީ އިންޑިއާގެ އެންމެ ހުނަރުވެރި ބަތަލާއިންގެ ތެރެއިން އެކެކެވެ. އޭނަ އަކީ މަޝްހޫރު ބަތަލާ/ޑައިރެކްޓަރު އަޕަރްނާ ސެންގެ ދަރިއެކެވެ.
މިހާތަނަށް ކާމިޔާބު އެތައް ފިލްމެއް ކުޅެފައިވާ ކޮންކޮނާގެ ކުރިއަށް އޮތް ފިލްމަކީ ނޮވެމްބަރުގައި ގެނެސްދޭން ހަމަޖެހިފައިވާ "މެޓްރޯ…އިން ދިނޯ" އެވެ. މި އެންތޮލޮޖީގެ ފުރަތަމަ ބައި 2007 ގެ "ލައިފް އިން އަ…މެޓްރޯ" ގެ ކާސްޓްގައި ވެސް ކޮންކޮނާ ހިމެނެ އެވެ.