ސަރުކާރާ ދެކޮޅަށް މަސައްކަތްކުރިކަމުގެ ތުހުމަތުގައި ހައްޔަރުކުރި ޗައިނާގެ އަންހެން ނޫސްވެރިޔަކު ފަސް އަހަރަށް ޖަލަށް ލާން ހުކުމްކޮށްފި އެވެ.
ގުއަންޒޯގެ މީޑިއާއެއްގައި ކުރިން މަސައްކަތް ކުރުމަށް ފަހު، ފަހުން ފްރީލާންސްކޮށް މަސައްކަތް ކުރަމުން އައި ހުއަންގް ޒީކިން ފަސް އަހަރަށް ޖަލަށްލާން ގުއަންޒޯ އިންޓަމިޑިއޭޓް ޕީޕަލްސް ކޯޓުން ހުކުމްކުރީ އިއްޔެ އެވެ. އޭނަ ފަސް އަހަރަށް ޖަލަށް ހުކުމް ކުރި އިރު 2021 ގެ ސެޕްޓެމްބަރުގައި ހައްޔަރުކުރި ގޮތަށް މިހާތަނަށް ވެސް ހުރީ ޖަލު ބަންދެއްގަ އެވެ.
ހުއަންގް، 36، އަކީ ޖިންސީ ފުރައްސާރަތަކާ ދެކޮޅަށް #މީޓޫގެ ނަމުގައި 2018 ގައި މުޅި ދުނިޔޭގައި ފެށި ހަރަކާތް ޗައިނާގައި ތައާރަފުކޮށް، ޖިންސީ ފުރައްސާރައިގެ މައްސަލަތަކާ ދެކޮޅަށް އެންމެ ބޮޑަށް އަޑު އުފުލަމުން ދިޔަ މީހާ އެވެ. އެގޮތުން 2018 ގެ ތެރޭގައި ހުއަންގް ވަނީ ޗައިނާގެ އަންހެން ދަރިވަރަކަށް އޭނަގެ ޕީއެޗްޑީ ސުޕަވައިޒަރު ޖިންސީ ގޯނާކުރަން އުޅުނު މައްސަލައެއް އާންމުންގެ ސަމާލު ކަމަށް ގެނެސް، އެ މައްސަލަ އަށް އިންސާފު ހޯދަން ގިނަ މަސައްކަތްތަކެއް ވެސް ކޮށްފަ އެވެ.
މީގެ އިތުރުން އަމިއްލަ އަށް ވެސް މަސައްކަތުގެ މާހައުލުގެ ތެރޭގައި ޖިންސީ ފުރައްސާރައާ ކުރިމަތިލާން ޖެހުނު ތަޖުރިބާތަކެއް #މީޓޫގެ ތެރެއިން ހުއަންގް ހިއްސާކޮށްފައިވެ އެވެ.
އޭނަ އިއްޔެ އިއްވި ހުކުމާ ގުޅިގެން އެމްނެސްޓީ އިންޓަނޭޝަނަލް އިން ކަންބޮޑުވުން ފާޅުކޮށް ބަޔާނެއް ވެސް ނެރެފައިވެ އެވެ. އޭގައި ބުނީ މިކަމުން ދައްކުވައި ދެނީ ހަމަ އާއި އިންސާފެއް ނެތްކަން ކަމަށާއި ހުއަންގް އަށް ފަސް އަހަރުގެ ހުކުމެއް އިއްވި އިރު ވެސް އޭނަ ހުރީ ނުހައްގު ބަންދެއްގައި ކަމަށެވެ.