ފަލަސްތީނުގެ މިނިވަން ކަމަށް މަސައްކަތް ކުރާ ހަމާސް ޖަމާއަތުން އިޒްރޭލު ސިފައިންތަކެއް މަރާލައިފި އެވެ.
ހަމާސް އިން މި ސިފައިންތައް މަރާލާފައިވަނީ ގާޒާގައި އިޒްރޭލު ސިފައިން ދުއްވާފައި ދިޔަ މިލިޓަރީ ވެހިކަލަކަށް ހަމަލާދީގެންނާއި އެ ވެހިކަލަށް އެހީތެރިކަން ފޯރުކޮށްދޭން އައި އިތުރު ވެހިކަލަކަށް ހަމަލާދީގެންނެވެ.
މިއީ ގާޒާގައި މިފަހުން އިޒްރޭލު ސިފައިންނާ ދެކޮޅަށް ހަމާސް އިން ދިން އެންމެ ނުރައްކާތެރި ހަމަލާ އެވެ.
އިޒްރޭލުން ގާޒާ އަށް އަރައިގަނެ ހަމަލާތައް ދޭން ފެށި ފަހުން މިހާތަނަށް އިޒްރޭލު 307 ސިފައިން ވަނީ މަރުވެފަ އެވެ. ހަނގުރާމަ ފެށުނު ފަހުން މިހާތަނަށް ގާޒާ އިން 37،000 މީހުން ޝަހީދުވެފައިވާއިރު، އޭގެތެރޭގައި ގިނައީ އަންހެނުންނާއި ކުޑަކުދިންނެވެ.
އިޒްރޭލު ސިފައިންނަށް އަމާޒުކޮށް ދިން ހަމަލާއާއެކު ހަނގުރާމަ ނިމުމަކަށް ގެންނަން އަވަށްޓެރި ގައުމުތަކުން ކުރަމުންދާ މަސައްކަތަށް އިތުރު ހުރަސްތަކެއް ކުރިމަތިވާނެ ކަމަށް ބެލެވޭ ކަމަށް ރިޕޯޓުތައް ބުނެ އެވެ.